Prif Gwnstabl Peter Vaughan
Peter Vaughan BSc (Anrh), Dip.App.Crim.
Prif Gwnstabl
Ymunodd Peter Vaughan â Heddlu De Cymru ym 1984, wedi iddo ennill BSc Dosbarth Cyntaf (Gwyddoniaeth Rheolaeth ac Ymchwil Gweithrediadau) o Brifysgol Cymru, Abertawe. Mae ganddo hefyd Ddiploma mewn Troseddeg Gymhwysol a Rheolaeth Heddlu o Brifysgol Caergrawnt.
Mae Peter yn falch ei fod wedi treulio amser ym mhob un o rengoedd Heddlu De Cymru yn gwasanaethu’r cymunedau lle cafodd ei fagu, ac y mae’n byw yno o hyd. Yn ystod rhan gyntaf ei yrfa gweithiodd mewn nifer o swyddi gweithredol cyn dod yn arweinydd Diogelwch Cymunedol fel Uwcharolygydd. Yna dyrchafwyd yn Bennaeth yr Uned Troseddau a Pholisïau Gweithredol. Rheolodd ddwy Uned Rheoli Sylfaenol yn ne Cymru am gyfnod o tua dwy flynedd yr un, ym Merthyr Tudful i ddechrau ac yna fel Prif Uwch-arolygydd yn Rhondda Cynon Taf.
Yn 2003 aeth ar y Cwrs Rheolaeth Strategol ac ym mis Rhagfyr yr un flwyddyn daeth yn Brif Gwnstabl Cynorthwyol Cwnstabliaeth Wiltshire. Yn ystod y cyfnod hwn fel unig Brif Gwnstabl Cynorthwyol yr Heddlu cafodd gyfrifoldeb dros pob mater gweithredol, gan arwain yr ymateb i nifer o ddigwyddiadau difrifol a phroffil uchel.
Ym mis Ionawr 2007 dychwelodd i Heddlu De Cymru fel Prif Gwnstabl Cynorthwyol gan dderbyn cyfrifoldeb dros bortffolio Cymunedau a Phartneriaethau. Ym mis Ebrill 2007 cafodd ei ddyrchafu yn Ddirprwy Brif Gwnstabl Heddlu De Cymru, ac ar 1 Ionawr 2010 daeth Peter yn Brif Gwnstabl Heddlu De Cymru.
Mae’n Ymddiriedolwr i Ymddiriedolaeth Ieuenctid Heddlu De Cymru, yn aelod o Gyngor Ymddiriedolaeth Tywysog Cymru ac yn aelod o Fwrdd Cynghori Busnes yn y Gymuned (BITC)
Mae’n Gadeirydd Cymdeithas Prif Swyddogion Heddlu Cymru ac yn Gadeirydd Portffolio Troseddau Meddiangar Cymdeithas y Prif Swyddogion Heddlu, sy’n rhoi cyngor a chanllawiau i’r gwasanaeth a’i bartneriaid ar bob agwedd ar droseddau meddiangar, megis byrgleriaethau a throseddau cerbyd.