Mae dedfryd yn y gymuned yn ffordd i dalu cymdeithas yn ôl am y drosedd a gyflawnoch.
Mae’n seiliedig ar gosbi’r troseddwr, newid ei ymddygiad, a gwneud iawn am y drosedd.
Gall cosbau cymunedol hefyd fynd i’r afael â materion personol a arweiniodd at y drosedd, megis bod yn gaeth i gyffuriau.
Dyma’r pedwar prif fath o ddedfryd yn y gymuned:
- Gorchymyn Cosb Gymunedol, lle bydd rhaid i chi gwblhau nifer penodol o oriau o waith heb dâl ar gyfer y gymuned. Os oes gennych swydd, bydd disgwyl i chi gwblhau’r gwaith cymunedol yn ystod eich amser eich hun.
- Gorchymyn Ailsefydlu Cymunedol, lle byddwch o dan oruchwyliaeth swyddog prawf am hyd y gorchymyn.
- Gorchymyn Canolfan Presenoldeb, lle bydd rhaid i chi gwblhau gweithgareddau penodol o dan oruchwyliaeth swyddog y ganolfan presenoldeb.
- Gorchymyn Triniaeth a Phrofion Cyffuriau, y mae’n bosib y cewch eich gorfodi i gwblhau os oes gennych broblem â chyffuriau. Yn ystod y gorchymyn, bydd rhaid i chi dderbyn triniaeth.
Yn dilyn diwygio dedfrydau, gall llysoedd bellach greu gorchymyn cymunedol pwrpasol sydd yn fwyaf addas ar gyfer y troseddwr unigol a’r drosedd. Mae ystod o amodau y gellir eu gorfodi, ac mae’n bosib y cewch eich gorchymyn i wasanaethu mwy nag un.
Maent yn cynnwys:
- Gwaith gorfodol (di-dâl)
- Rhaglenni wedi’u hanelu at newid ymddygiad troseddol
- Cymryd rhan mewn gweithgareddau cymunedol
- Gwahardd rhag gweithgareddau penodol
- Gwahardd rhag mannau penodol
- Cyrffyw
- Gofyniad preswylio
- Triniaeth a phrofion cyffuriau (gyda chaniatâd y troseddwr)
- Triniaeth alcohol (gyda chaniatâd y troseddwr)
- Triniaeth iechyd meddwl (gyda chaniatâd y troseddwr)
- Goruchwyliaeth
- Presenoldeb
Gallai methu â chydymffurfio ag amodau’r ddedfryd hon olygu y cewch eich anfon yn ôl i’r llys ar gyfer eich ail-ddedfrydu neu er mwyn cael dirwy am dorri’r ddedfryd.