Grŵp Troseddau Cyfundrefnol yn cael ei ddedfrydu i gyfanswm o 116 o flynyddoedd yn y ddalfa am herwgipio yng Nghaerdydd.

Grŵp Troseddau Cyfundrefnol yn cael ei ddedfrydu i gyfanswm o 116 o flynyddoedd yn y ddalfa am  herwgipio yng Nghaerdydd

Mae naw dyn wedi cael eu carcharu ar ôl herwgipio dyn o Gaerdydd.

Cafodd yr achos hwn ei ddisgrifio fel un o'r ymchwiliadau herwgipio mwyaf cymhleth yn y DU dros y blynyddoedd diwethaf.

Tua 4.30pm ddydd Gwener, 11 Rhagfyr, 2020, cafodd dyn 22 oed ei herwgipio o Clifton Street, Sblot, i Odet Court ar Heol Pendwyallt, yr Eglwys Newydd.

Heb yn wybod iddo, roedd cynllun herwgipio eisoes ar waith gan Grŵp Troseddau Cyfundrefnol er mwyn cael arian oddi wrtho ef, a'i ffrindiau, a oedd yn cynnwys dal gwn a chyllell i'w bygwth, ac roedd hynny'n cynnwys gofyn am daliad pridwerth o £50k i sicrhau y byddai'n dychwelyd yn ddiogel.

Am 7.57pm y diwrnod hwnnw, cafodd Heddlu De Cymru alwad 999 a lansiwyd ymchwiliad gan Dîm Ymchwilio i Droseddau Mawr yr heddlu.

Cafodd y dioddefwr, a oedd yn adnabyddus i aelod o giang yn Llundain, ei gludo wedyn i leoliad arall yn Hemel Hempstead, Lloegr, lle parhawyd i'w guro, ei roi mewn gefynnau, ei fygwth â chyllell a'i gadw dan fygythiad ci wedi'i hyfforddi i ymosod yn ffyrnig.

O ganlyniad i ymchwiliad ar y cyd â sawl heddlu a'r Asiantaeth Troseddu Genedlaethol, cafodd y dioddefwr ei achub yn ddiogel o'r cyfeiriad yn Hemel Hempstead am 11.30pm nos Sadwrn, 12 Rhagfyr.

Yn ystod gwrandawiad llys, dywedodd y dioddefwr: “Achubodd yr heddlu fy mywyd. Dydw i ddim yn credu y byddwn i'n fyw oni bai bod yr heddlu wedi dod y diwrnod hwnnw. Rwyf 100% yn siŵr. Wn i ddim pam eu bod am i fi farw, ond rwy 100% yn siŵr na fyddwn i'n fyw.”

Bron i dair blynedd yn ddiweddarach ac yn dilyn tri threial, mae naw dyn wedi cael eu dyfarnu'n euog.

Cawsant ddedfryd o gyfanswm o 116 o flynyddoedd yn Llys y Goron Caerdydd heddiw. Rhoddwyd dedfrydau estynedig i chwech o'r naw dyn a oedd yn gyfanswm o 22 o flynyddoedd oherwydd y perygl y maent yn ei beri i'r cyhoedd. Mae hyn yn golygu, pe baent yn cyflawni unrhyw droseddau ychwanegol tra byddant ar drwydded, ar ddiwedd eu cyfnod yn y carchar, y byddant yn dychwelyd i'r carchar am weddill eu dedfryd wreiddiol.

Cafodd y canlynol eu dyfarnu'n euog o herwgipio, carcharu ffug, a blacmel:

• Fortune Lawson, 27, o Ealing, Llundain. Dedfrydwyd i 25 mlynedd yn y carchar a 5 mlynedd o ddedfryd estynedig. (Cafodd Lawson hefyd ei ddedfrydu am ei ran mewn ail achos o herwgipio a blacmel yn Llundain yn 2018).
• Davood Assadopour, 32, o Harrow, Llundain. Dedfrydwyd i 15 mlynedd yn y carchar a 4 mlynedd o ddedfryd estynedig.
• Micaiah Marley, 30, o Watford. Dedfrydwyd i 15 mlynedd yn y carchar a 4 mlynedd o ddedfryd estynedig.
• Arnold Fumumeya, 27, o Harrow, Llundain. Dedfrydwyd i 13 mlynedd yn y carchar a 3 mlynedd o ddedfryd estynedig.
• Alexis Mutesa, 27, o Brent, Llundain. Dedfrydwyd i 13 mlynedd yn y carchar a 3 mlynedd o ddedfryd estynedig.
• Gideon Lawson, 24, o Lundain. Dedfrydwyd i 12 mlynedd yn y carchar a 3 mlynedd o ddedfryd estynedig.
• Ahmed Omar, 29, o Mitcham, Surrey. Dedfrydwyd i 9 mlynedd yn y carchar.
• Hefyd, cafodd Denis Delishaj, 24, o Harrow, Llundain, ei ddyfarnu'n euog o flacmel. Dedfrydwyd i 8 mlynedd yn y carchar ac 8 mis am feddu ar ffôn gwaharddedig tra roedd yn y carchar yn aros am y treial.
• Cafodd Stephen Isaac, 66, o Hemel Hempstead, ei ddyfarnu'n euog o herwgipio a charcharu ffug. Dedfrydwyd i 6 mlynedd.

Yn ystod yr ymchwiliad, atafaelwyd arfau gan gynnwys chwe chyllell, pum cyfres o getris byw, gwn llaw, bom mwg grenâd, a thaser a oedd yn edrych fel ffôn symudol.

Cafodd mwy na 400 awr o glipiau Teledu Cylch Cyfyng eu hadfer gan dditectifs ar draws 5 ardal Heddlu a chymerwyd mwy na 1,000 o ddatganiadau.

Dywedodd y Ditectif Uwch-arolygydd Darren George, pennaeth y Tîm Ymchwilio i Droseddau Mawr: “Mae herwgipio a'r defnydd troseddol o arfau tanio yn brin iawn yn Heddlu De Cymru ond pan fyddant yn digwydd, fel y daeth y Grŵp Troseddau Cyfundrefnol hwn i wybod, rydym yn benderfynol o fynd ar ôl y troseddwyr.

“Roedd hwn yn un o ymchwiliadau herwgipio mwyaf cymhleth y DU yn y blynyddoedd diwethaf, a chymerodd bron i dair blynedd i ddyfarnu'r naw unigolyn hyn yn euog.

“Rydym yn gobeithio y bydd ein buddsoddiad yn y drosedd hon a'r dedfrydau a roddwyd yn rhoi neges glir i'r rhai sy'n benderfynol o achosi trais o'r fath ar ein strydoedd.

“Byddwn yn mynd ar eich ôl gyda phopeth o fewn ein gallu a byddwch yn mynd i'r carchar.”