Bachgen yn ei arddegau wedi cael ei ddedfrydu am nifer o droseddau rhywiol yn erbyn plant

Mae dyn 19 oed wedi cael ei ddedfrydu am gyflawni 69 o droseddau rhywiol neu droseddau cysylltiedig yn erbyn pobl ifanc dan oed.

Cafodd Cory Jones o Rees Street, Treorci, ei ddedfrydu heddiw i gyfanswm o wyth mlynedd am y troseddau, a ddigwyddodd drwy gydol 2024, pan oedd Jones yn 17 a 18 oed, ac a oedd yn ymwneud â 37 o ddioddefwyr rhwng 10 ac 16 oed.

Roedd y cyhuddiadau yn erbyn Jones yn cynnwys:

• Cyfathrebu rhywiol gyda phlentyn
• Achosi i blentyn wylio gweithred rywiol
• Achosi i blentyn gymryd rhan mewn gweithred rywiol
• Achosi/annog treiddio'r wain
• Rhannu lluniau o natur bersonol heb gydsyniad
• Blacmel
• Dosbarthu lluniau anweddus
• Bod â lluniau yn ei feddiant

Bydd Jones hefyd yn destun Gorchymyn Atal Niwed Rhywiol amhenodol a bydd ar y Gofrestr Troseddwyr Rhyw am oes.

Mynegodd y Ditectif Arolygydd Stuart Prendiville ddifrifoldeb gweithredoedd Jones, gan ddweud:

"Targedodd Cory Jones fenywod ifanc ar y cyfryngau cymdeithasol yn fwriadol, gan ddweud celwydd am ei oedran a defnyddio tactegau ystrywgar, twyllodrus. Mae ei gam-fanteisio ar blant agored i niwed er mwyn cael boddhad rhywiol yn ein hatgoffa o'r peryglon sy'n bodoli ar-lein.

“Mae ein meddyliau gyda'r dioddefwyr a'u teuluoedd ar yr adeg anodd hon. Rydym yn gobeithio y bydd yr euogfarn a'r ddedfryd a gyflwynwyd heddiw yn rhoi rhywfaint o gysur a chyfiawnder i'r rheini a gafodd eu heffeithio.

"Bydd hyn gobeithio yn rhybudd na chaiff ymddygiad rheibus o'r fath ei oddef, a bod yn rhaid i ni fod yn wyliadwrus wrth amddiffyn ein plant."

Rydym yn cydnabod dewrder anhygoel goroeswyr cam-drin rhywiol wrth roi gwybod am eu profiadau. Mae Heddlu De Cymru yn ymrwymedig i sicrhau y byddwn yn gwrando ar ddioddefwyr, yn eu trin ag urddas a pharch, ac yn eu cefnogi drwy'r broses farnwrol.

Mae adnoddau a gwasanaethau cymorth ar gael i'r rheini sy'n dioddef mewn tawelwch, neu'r rheini sydd wedi cael eu cam-drin yn rhywiol ond nad ydynt yn barod eto i roi gwybod amdano i'r heddlu. Ceir rhagor o wybodaeth ar https://www.south-wales.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/cymorth-treisio-ymosodiadau-rhywiolual-assault/