Ymosodwr rhyw o Gaerdydd wedi'i olrhain a'i ddedfrydu ar ôl apêl Crimewatch

Mae Fawaz Alsamaou, 33 oed o Huddersfield, Gorllewin Swydd Efrog, wedi cael ei garcharu am ymosod ar fenyw yn rhywiol yn Cathays, Caerdydd.

Roedd y fenyw yn cerdded o ganol y ddinas yn ystod oriau mân fore dydd Sul 12 Mai 2024, pan ddaeth yn ymwybodol o ddyn yn cerdded y tu ôl iddi.

Yna, ymosodwyd arni yn rhywiol o dan y bont rheilffordd ger Neuadd Senghenydd.

Cynhaliwyd ymholiadau estynedig, a nodwyd Alsamaou fel unigolyn dan amheuaeth yn dilyn apêl teledu cylch cyfyng am wybodaeth ar raglen Crimewatch y BBC.

Mewn Datganiad Personol Dioddefwr i'r llys, disgrifiodd y fenyw, nawr yn 24 oed, effaith y drosedd arni.

“Mae'r ymosodiad wedi cael effaith barhaus arnaf hyd heddiw ac rwy'n parhau i feddwl amdano bob dydd. Nawr rwy'n teimlo fy mod i'n edrych dros fy ysgwydd yn fwy a bob amser yn meddwl y gwaethaf. Nid wyf yn teimlo'n ddiogel yn mynd i unrhyw le ar fy mhen fy hun ac nid wyf yn teimlo'n ddiogel nawr pan fydd hi'n dywyll allan.

“Hoffwn i'r dyn sy'n gyfrifol am yr ymosodiad gael ei ddwyn i gyfrif. Nid yn unig i gael rhyw fath o gysur o'r digwyddiad ond i sicrhau nad yw hyn yn digwydd i unrhyw fenywod eraill yn y dyfodol.”

Cafodd Alsamaou ei garcharu a'i ddedfrydu yn Llys y Goron Caerdydd heddiw i dair blynedd ac un mis yn y carchar am yr ymosodiad rhywiol a 16 mis i gydredeg am dagu bwriadol.

Dywedodd y Ditectif Ringyll Alex Lloyd, o Heddlu De Cymru:

“Mae gan bawb yr hawl i deimlo'n ddiogel, ar unrhyw adeg o'r dydd, ble bynnag y maent, ac mae Heddlu De Cymru yn gwneud popeth o fewn ei allu i sicrhau bod pobl yn teimlo'n ddiogel wrth fyw eu bywydau bob dydd.

“Rydym yn gobeithio y bydd y ddedfryd heddiw yn rhoi cysur i'r dioddefwr, y mae wedi bod yn chwilio amdano.

“Mae digwyddiadau gan bobl ddieithr yn anarferol iawn, ond pan fyddant yn digwydd, rydym yn defnyddio'r holl ddulliau plismona sydd ar gael, gan gynnwys apeliadau yn y cyfryngau am wybodaeth i ddwyn troseddwyr o flaen eu gwell.

“Hoffem gydnabod dewrder y dioddefwr wrth roi gwybod a diolch i raglen Crimewatch y BBC am ei chymorth.”

** 

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.
Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod amdano i'r heddlu eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.