Tri dyn yn cael eu dedfrydu i 75 o flynyddoedd am geisio llofruddio a herwgipio ym Merthyr

Mae tri dyn wedi cael eu dedfrydu i gyfanswm o 75 mlynedd yn y carchar am ymgais i lofruddio a herwgipio dyn o Ferthyr yn gynharach eleni.

Ychydig ar ôl 10pm nos Llun 10 Chwefror, 2025, daeth dyn 28 oed o Ferthyr i'r ysbyty ag anafiadau trywanu. Aeth swyddogion i'r ysbyty a chadarnhawyd bod y dioddefwr wedi cael ei wthio i mewn i gerbyd lle yr ymosodwyd arno.

Digwyddodd hyn ar ôl i'r dioddefwr gyrraedd parc manwerthu mewn car gyda'i chariad i gyfarfod â'i ffrind Luke Williams, a oedd wedi'i wahodd. Gan ddefnyddio grym, aeth Tyshane Brown a Williams â'r dioddefwr i mewn i gar arall, lle y rhoesant fwgwd dros ei lygaid a'i herwgipio. Er gwaethaf ei ymdrechion i ddianc, cafodd ei drechu a'i drywanu. Wrth iddo gael ei herwgipio, gwnaed galwad ffôn i gariad y dioddefwr o'r tu mewn i'r car, yn gofyn am bridwerth o £5,000. Clywodd y dioddefwr yn pledio am gymorth, gan weiddi ei fod yn cael ei drywanu a bod ganddynt gyllyll a gwn.

Wrth i'r digwyddiad brawychus barhau, cafodd y dioddefwr ei yrru o amgylch ardal Merthyr tra roedd mwgwd dros ei lygaid ac ymosodwyd arno unwaith eto. Rhoddodd ei gariad wybod i'w dad yn ddi-oed a chysylltodd yntau â thri ffrind i helpu i'w achub. Gwnaed trefniadau gyda'r herwgipwyr i drosglwyddo'r pridwerth, gyda'r cariad yn rholio siaced i efelychu'r arian parod a'i gadael yn y parc manwerthu.

Cafodd ymgais i achub y dioddefwr gan ei dad a'i ffrindiau ei atal wrth iddynt nesáu at y car. Cafodd ffenestr ei thorri yn y car yn ystod yr anhrefn, ond nid oedd y dioddefwr yn gallu dianc. Gyrrodd y car i ffwrdd yn gyflym, gyda thad y dioddefwr yn ei ddilyn, gan daro yn erbyn y cerbyd yn y pen draw mewn ymgais i ryddhau'r dioddefwr. Wrth wneud hynny, cafodd y dioddefwr ragor o anafiadau, gan gynnwys clwyf trywanu i linyn ei ar. Yn y diwedd, cafodd ei gludo i'r ysbyty lle y cadarnhawyd ei fod wedi cael ei drywanu naw gwaith, gan gynnwys clwyf difrifol i'w abdomen.

Yn ddiweddarach daeth swyddogion o hyd i'r car a oedd wedi cael ei adael ar ôl i aelod o'r cyhoedd roi gwybod amdano a chanfod staen gwaed mawr.

Dangosodd archwiliad meddygol dilynol fod gan y dioddefwr sawl anaf, gan gynnwys clwyfau i'w wyneb, ei abdomen, ei gefn, ei werddyr a'i forddwyd, ynghyd ag arwyddion o waedu mewnol.

Er i'r heddlu chwilio amdanynt, cafodd Williams a Brown eu gweld gyda'i gilydd gwta ddau ddiwrnod ar ôl y digwyddiad yn un o orsafoedd petrol BP yn Swydd Henffordd. Ar 27 Chwefror, arestiodd swyddogion Williams a Brown mewn parc carafanau yn Kidderminster. Wrth chwilio'r garafán, canfu swyddogion yr heddlu eitemau gan gynnwys balaclafa, cyllell a dillad a oedd yn union debyg i'r dillad roedd Williams yn eu gwisgo yn y deunydd fideo o orsaf petrol BP.

Cafodd y tri eu dedfrydu heddiw am ymgais i lofruddio; achosi niwed corfforol difrifol o dan Adran 18; herwgipio; blacmel; meddu ar arf tanio; a bod ag eitem lafnog yn eu meddiant.

• Cafodd Tyshane Brown, 30 oed o Freshford Court, Grange Road, Weymouth, ei ddedfrydu i 30 mlynedd
• Cafodd George Miles-Williams, 24 oed o Careless Close, Henffordd, ei ddedfrydu i 20 mlynedd
• Cafodd Luke Williams, 19 oed o Clifford, Henffordd, ei ddedfrydu i 25 mlynedd