Carcharu adeiladwyr sy'n fasnachwyr twyllodrus ar ôl twyllo cwpwl oedrannus i wario eu cynilion bywyd

Mae dau adeiladwr wedi cael eu carcharu ar ôl twyllo cwpwl oedrannus i wario eu cynilion bywyd.

Gwnaeth Dave McEvoy, 51 oed o'r Sblot, Caerdydd a Joseph Ellis, 21 oed o Basildon, Essex, dargedu cyfeiriad yn Ystalyfera, Castell-nedd Port Talbot cyn cytuno i “lanhau'r to” ar gyfer y dioddefwr 83 oed.

Ar ôl codi tâl o £1,000 ar y dyn i ddechrau, aeth y ddau i gartref y dioddefwr ar nifer o achlysuron i wneud y ‘gwaith’, ond ar bob achlysur gwnaethant ofyn i'r dioddefwr am fwy o arian wrth iddynt barhau i ddod o hyd i ‘ddiffygion’ yn y to.

Gwnaeth y ddau ddwyn cyfanswm o £33,200 o arian gan y dyn ym mis Gorffennaf 2024. Gwnaethant hefyd geisio darbwyllo'r cwpwl oedrannus i ailforgeisio er mwyn rhyddhau ecwiti.

Dangosodd adolygiad o fyngalo'r cwpwl y dylai'r gwaith fod wedi costio tua £700-800 yn unig.

Plediodd y ddau ddyn yn euog i dwyll drwy ymhoniad anwir ac maent wedi cael eu dedfrydu i ddwy flynedd a thri mis yn y carchar.

Dywedodd y Ditectif Gwnstabl Rachel Thomas:

“Mae Dave McEvoy a Joseph Ellis yn fathau o droseddwyr nad ydynt yn teimlo unrhyw gywilydd wrth dwyllo pobl i'r fath raddau.

“Mae targedu cwpwl oedrannus ac agored i niwed nid dim ond unwaith, ond dro ar ôl tro nes eu bod wedi colli eu holl gynilion bywyd, yn dangos nad oes gan y ddau ddyn hyn unrhyw anrhydedd a pharch.

“Gwneud mwy o arian oedd yn bwysig i'r ddau ac nid oeddent yn poeni dim am y niwed roeddent yn ei achosi i fywydau'r dioddefwyr.”