Dyn o Hirwaun wedi'i ddedfrydu i wyth mlynedd yn y carchar am droseddau rhyw yn erbyn plant

Ddydd Gwener, 7 Tachwedd, cafodd Rowan Barnett-Davies, dyn 23 oed sy'n byw ar Brecon Road, Hirwaun, ei ddedfrydu i wyth mlynedd yn y carchar yn Llys y Goron Casnewydd.

Cyn hyn, roedd wedi pledio'n euog i nifer o gyhuddiadau difrifol yn cynnwys troseddau rhyw yn erbyn plant, gan gynnwys 21 achos o achosi neu annog plentyn i gymryd rhan mewn gweithgarwch rhywiol, tri achos o gyfathrebu'n rhywiol â phlentyn, 11 achos o rannu lluniau anweddus a saith achos o fod â lluniau anweddus, gwaharddedig ac eithafol yn ei feddiant.

Datgelodd yr ymchwiliad gan Heddlu De Cymru fod Barnett-Davies wedi camfanteisio ar 20 o ddioddefwyr, pob un ohonynt rhwng 12 ac 16 oed pan ddigwyddodd y troseddau. Derbyniodd swyddogion gudd-wybodaeth yn ymwneud â'r ffaith bod gan Barnett-Davies ddeunydd cam-drin plant yn rhywiol yn ei feddiant, a ysgogodd ymchwiliad cynhwysfawr i'w weithredoedd.

Uwchgyfeiriwyd yr ymchwiliad ar 20 Rhagfyr, 2024, pan roddodd Heddlu Gorllewin Mersia wybod bod posibilrwydd bod Barnett-Davies yn cyfathrebu'n rhywiol â merch 13 oed. Rhoddodd mam y ferch wybod i'r heddlu ar ôl darganfod bod ei merch wedi bod yn cyfathrebu â Barnett-Davies ar-lein, yr honnir iddo anfon arian ati yn gyfnewid am luniau anweddus. Gan ymateb yn gyflym, aeth swyddogion o Dîm Ymchwiliadau Ar-lein Heddlu De Cymru i gartref Barnett-Davies y diwrnod canlynol.

Ar ôl cyrraedd ei breswylfa, daeth swyddogion o hyd i Barnett-Davies yn cysgu yn ei ystafell wely, gyda dau ffôn symudol wedi'u lleoli wrth ei ymyl. Cafodd ei arestio ar amheuaeth o fod â lluniau anweddus o blant yn ei feddiant a chyfathrebu'n rhywiol â phlentyn.

Wrth i'r ymchwiliad ddatblygu, arweiniodd chwiliadau pellach o gartref Barnett-Davies at atafaelu nifer o ffonau symudol. Cadarnhawyd bod y tri ffôn y daethpwyd o hyd iddynt yn ei ystafell wely yn perthyn iddo, a rhoddodd y cyfrineiriau angenrheidiol i'r swyddogion gael mynediad at y cynnwys a oedd arnynt.

Mewn ail arestiad ar 19 Mawrth 2025, daeth swyddogion o hyd i Barnett-Davies yn ei gartref eto. Cafodd ei arestio ar amheuaeth o droseddau ychwanegol, gan gynnwys bod â lluniau anweddus o blant yn ei feddiant a'u rhannu, ac annog plentyn i gymryd rhan mewn gweithgarwch rhywiol. Unwaith eto, cafodd rybudd, aeth yr ymchwiliad yn ei flaen ac atafaelwyd ffôn symudol arall.

Yn dilyn archwiliad trylwyr o'r dystiolaeth yn ei erbyn, plediodd Barnett-Davies yn euog i'r cyhuddiadau.

Dywedodd y Ditectif Gwnstabl Amy Partridge o Heddlu De Cymru:

"Mae euogfarn Rowan Barnett-Davies yn dangos ein hymrwymiad i amddiffyn plant rhag pobl sydd am gamfanteisio arnynt. Byddwn yn parhau i weithio'n ddiflino i ddwyn y sawl sy'n targedu pobl sy'n agored i niwed o flaen eu gwell.

"Mae penderfyniad y llys yn anfon neges glir na fyddwn yn goddef gweithredoedd ffiaidd o'r fath, a bydd troseddwyr yn wynebu canlyniadau difrifol. Rwy'n annog unrhyw un sy'n amau achos o gamfanteisio ar blant i roi gwybod amdano ar unwaith."

Rydym yn cydnabod dewrder anhygoel goroeswyr cam-drin rhywiol wrth rannu eu profiadau. Mae'n gam anodd, a hoffwn roi sicrwydd i chi y byddwch yn cael eich clywed, eich trin ag urddas, a'ch cefnogi ar bob cam o'r ffordd drwy'r broses farnol.

Os ydych wedi profi cam-drin rhywiol ac nad ydych yn barod i roi gwybod i'r heddlu, cofiwch nad oes rhaid i chi wynebu hyn ar eich pen eich hun. Mae nifer o adnoddau a gwasanaethau cymorth ar gael i'ch helpu. Gallwch ddod o hyd i ragor o wybodaeth a chymorth yma: https://www.south-wales.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/cymorth-treisio-ymosodiadau-rhywiolual-assault/