Carcharu dyn o Orseinon am lofruddio babi pum mis oed

Mae dyn o Abertawe wedi'i garcharu ar ôl cael ei ganfod yn euog o lofruddio babi pum mis oed.

Roedd Thomas Morgan, 29 oed o Orseinon, wedi pledio'n ddieuog yn gynharach i lofruddiaeth Jensen-Lee Dougal yn ei gartref ar Players Avenue, Clydach, a ddigwyddodd tra bod mam Jensen-Lee yn y gwaith ar 31 Mawrth 2024.

Fodd bynnag, ddydd Mawrth 10 Chwefror, cafodd rheithgor ef yn euog o lofruddiaeth, yn ogystal ag un achos o achosi niwed corfforol difrifol.

Heddiw, mae wedi cael ei ddedfrydu i 19 mlynedd yn y carchar.

Dywedodd y Ditectif Brif Arolygydd Lianne Rees:

“Ar ôl y ddedfryd heddiw, rydym wedi sicrhau cyfiawnder i'r drosedd erchyll a gyflawnwyd gan Thomas Morgan ar fachgen bach diamddiffyn.
“Er bod Thomas Morgan yn mynd i'r carchar o'r diwedd, ni fydd hyn yn gwneud fawr ddim i leddfu galar teulu Jenson-Lee, yn enwedig ei fam Jordan, a oedd yn ymddiried yn ei chyn-bartner Thomas Morgan i edrych ar ôl Jenson-Lee, dim ond i gael ei bradychu yn y ffordd waethaf bosibl.
“Hoffwn dalu teyrnged i aelodau o'r cyhoedd, yr ymatebwyr cyntaf a phawb a fu'n rhan o'r ymdrechion taer i achub bywyd Jenson-Lee, wrth wynebu'r amgylchiadau mwyaf ofnadwy a thrasig yn ôl ym mis Mawrth 2024. Hoffwn hefyd gydnabod yr urddas a'r cryfder anhygoel a ddangoswyd gan deulu Jenson-Lee drwy gydol y daith boenus hon.
“Yn olaf, hoffwn ddiolch i'r tîm ymchwilio, Gwasanaeth Erlyn y Goron, a'r Cwnsler Erlyn am eu gwaith caled parhaus drwy gydol achos sydd wedi cynnwys ymchwiliad a threial anodd iawn.”

Yn dilyn y ddedfryd heddiw, dywedodd Jordan, mam Jensen-Lee:

"Dim ond pum mis oed oedd Jensen-Lee pan gymerwyd ei fywyd. Roedd yn gwbl ddiniwed ac yn llwyr ddibynnol ar yr oedolion oedd o'i amgylch i'w gadw'n ddiogel.
"Ers marwolaeth Jensen-Lee, mae fy mywyd wedi newid am byth. Rwy'n byw gyda galar, trawma a phoen emosiynol ofnadwy.
"Ces i byth y cyfle i glywed Jensen-Lee yn dweud ei fod yn fy ngharu. Bydda' i byth yn ei glywed yn fy ngalw'n "mami". Bydda' i byth yn ei weld yn cymryd ei gamau cyntaf, yn dweud ei eiriau cyntaf, yn dechrau yn yr ysgol, neu'n tyfu i fod y person y dylai fod. Nid colli'r digwyddiadau hyn y gwnes i – cawsant eu cymryd.
"O ganlyniad i'r hyn a wnaeth Thomas Morgan, rwy' hefyd wedi cael dedfryd am oes, ond dedfryd o alar yw fy un i.
"Ni chaiff Jensen-Lee fyth ei anghofio. Rwy'n dy garu di, Jensen-Lee."

Dyma'r foment pan oedd Thomas Morgan o Abertawe yn siarad gyda gweithredwr galwadau 999 ar ôl iddo anafu Jensen-Lee Dougal, pump mis oed, yn angheuol: