Carchar i dri dyn am droseddau arfau tanio

Mae tri dyn o Ferthyr Tudful wedi cael eu carcharu yn dilyn digwyddiad yn ymwneud ag arfau tanio yn ardal y Gurnos ddydd Sadwrn 9 Awst 2025.

Ymddangosodd Rhys Mew, 25 oed, Jack Mew, 19 oed, a Garyn Marshall-Palmer, 20 oed, pob un ohonynt o'r Gurnos ym Merthyr Tudful, gerbron y llysoedd yn dilyn ymchwiliad helaeth gan Heddlu De Cymru.

Tua 12.30am ddydd Sul 10 Awst 2025, daeth Heddlu De Cymru yn ymwybodol o ffrwgwd oedd wedi digwydd yn y Gurnos, ger Magnolia Close.

Cafodd y dioddefwr ei adnabod, ond ni chynorthwyodd ymchwiliad yr heddlu. Er hynny, parhaodd Heddlu De Cymru i ymchwilio i'r digwyddiad.

Ar ôl mwy o waith ymchwilio, cynnal chwiliadau, ac adroddiadau gan dystion, canfuwyd bod tri dyn wedi bygwth dyn arall, a daethpwyd o hyd i ffôn symudol a chasin bwled 9mm yn y lleoliad.

Roedd y ffôn yn cysylltu’r ddyfais â Rhys Mew. Ar y ffôn, roedd clipiau ohono yn gwneud bygythiadau, ac roedd fideos o’r noson ar 9 Awst lle’r oedd Jack Mew a Palmer yn bresennol.

Cafodd y tri dyn eu harestio. Wrth chwilio cartref Mew, daeth swyddogion o hyd i dair bwled oedd wedi cael eu cuddio yn yr atig, a dangosodd lluniau teledu cylch cyfyng fod Mew wedi cuddio arf tanio mewn bag cyn teithio gyda'r dynion eraill mewn BMW 1 Series ar ôl y digwyddiad. Cadarnhaodd profion fforensig yn ddiweddarach fod y casin a gafodd ei adfer wedi cael ei danio gan bistol hunan-lwytho.

Yn dilyn pledion euog ar 6 Chwefror 2026, ymddangosodd y tri dyn gerbron Llys y Goron Merthyr Tudful i gael eu dedfrydu ar Ebrill 27.

Cafwyd Rhys Mew yn euog o fod ag arf tanio yn ei feddiant gyda'r bwriad o godi ofn o drais a bod â bwledi a chetris ar gyfer arf tanio yn ei feddiant heb dystysgrif.

Cafodd Mew ei ddyfarnu'n euog a'i ddedfrydu mewn cysylltiad ag ymchwiliad arall hefyd, lle plediodd yn euog i ymwneud â chyflenwi crac cocên, ymwneud â chyflenwi cocên, bod â chyffur dosbarth A a reolir - cocên - yn ei feddiant gyda'r bwriad o’i gyflenwi, cynllwynio i gyflenwi cyffur dosbarth A a reolir - crac cocên, a chynllwynio ag eraill i ymwneud â chyflenwi cocên. Cafodd ei ddedfrydu i gyfanswm o wyth mlynedd a thri mis yn y carchar.

Cafwyd Jack Mew yn euog o fod ag arf tanio yn ei feddiant gyda'r bwriad o godi ofn o drais a bod â bwledi a chetris ar gyfer arf tanio yn ei feddiant heb dystysgrif. Cafodd ei ddedfrydu i dair blynedd mewn sefydliad i droseddwyr ifanc.

Cafwyd Garyn Marshall-Palmer yn euog o fod ag arf tanio yn ei feddiant gyda'r bwriad o godi ofn o drais. Cafodd ei ddedfrydu i ddwy flynedd a naw mis mewn sefydliad i droseddwyr ifanc.

Dywedodd y Ditectif Arolygydd Jonathan Allen:

“Roedd hwn yn ymosodiad peryglus a brawychus lle cafodd arf tanio ei danio mewn ardal breswyl. Er bod troseddau sy'n ymwneud ag arfau tanio yn anghyffredin iawn, byddai hyn wedi peri pryder i’r trigolion lleol yn sicr.

"Er nad oedd y dioddefwr yn barod i gynorthwyo’r ymchwiliad, llwyddodd swyddogion i gyfuno tystiolaeth o luniau teledu cylch cyfyng, tystiolaeth ddigidol, a'r hyn y dywedodd tystion wrthynt i sicrhau bod yr unigolion peryglus hyn yn cael eu dwyn o flaen eu gwell. Does dim lle i arfau tanio na throseddau sy'n ymwneud â chyffuriau yn ein cymunedau, ac mae'r achos hwn yn dangos y byddwn yn gweithio'n ddiflino i fynd ar ôl y rhai sy’n troseddu."