Carcharu stelciwr am dair blynedd

Mae dyn a stelciodd ddwy ferch ifanc wedi cael ei garcharu yn dilyn ymchwiliad gan Heddlu De Cymru.

Mae Zulfkar Ahmed, 67 oed o Grangetown, wedi cael ei garcharu am dair blynedd am ddau gyhuddiad o stelcio gan gynnwys achosi braw a gofid difrifol, ac un cyhuddiad o dorri amodau gorchymyn atal stelcio.

Roedd Ahmed, a gafodd ei garcharu ar 15 Ebrill, wedi pledio'n ddieuog i'r troseddau ond fe'i cafwyd yn euog gan reithgor yn dilyn achos llys dros gyfnod o bedwar diwrnod yn Llys y Goron Caerdydd ar 13 Chwefror.

Clywodd y llys fod Ahmed wedi stelcio dau ddioddefwr. Stelciodd yr un dioddefwr rhwng 2022 a 2025, a'r llall rhwng 2024 a 2025.

Gwnaeth Ahmed gwrdd â'r ddwy fenyw am y tro cyntaf yn eu lle gwaith. Dechreuodd y dioddefwr cyntaf, oedd yn 24 oed ar y pryd, sgwrsio ag Ahmed oedd yn gwsmer mewn caffi yr oedd hi'n gweithio ynddo. Dywedodd Ahmed wrth y dioddefwr y gallai gynnig swydd iddi ac, ar ôl cryn ddarbwyllo ar ran Ahmed, rhoddodd y dioddefwr ei rhif ffôn iddo.

Er bod y negeseuon tesun a gafodd eu hanfon yn ôl ac ymlaen yn gyfeillgar i ddechrau, dechreuodd y dioddefwr deimlo’n anghyfforddus gyda’r negeseuon yr oedd Ahmed yn eu hanfon ati, a stopiodd ymateb. Dros gyfnod o dair blynedd, roedd Ahmed wedi anfon dros 10,000 o negeseuon testun at y dioddefwr er iddi roi’r gorau i ymateb iddo a'i rhwystro.

Yn ystod y cyfnod hwn, roedd Ahmed yn mynd i le gwaith y dioddefwr yn rheolaidd, ei chwistrellu â phersawr, mynd i fyny ati yn y stryd, a cheisiodd roi pwrs iddi y gwnaeth ei wrthod. Prynodd fag iddi hefyd, gan roi rhif y dioddefwr i weithiwr mewn siop fel y gallai ei ffonio i ddweud wrthi am gasglu'r anrheg ddigymell.

Gwnaeth yr ail ddioddefwr, oedd yn 18 ar y pryd, gwrdd ag Ahmed am y tro cyntaf yn y gwaith yn 2024. Ar ôl gofyn iddi am help, dechreuodd Ahmed ofyn cwestiynau personol a chynigiodd ei helpu gyda'i hastudiaethau. Ceisiodd ofyn beth oedd ei phatrymau shifft hefyd cyn iddi gerdded i ffwrdd.

Parhaodd i fynd i’w lle gwaith, ac roedd rhaid iddi symud i ardaloedd ‘staff yn unig’ yn y siop er mwyn ei osgoi. Byddai'n gofyn i aelodau eraill o staff ble roedd hi, a phan ddywedodd un ohonynt gelwydd wrtho - gan ddweud nad oedd hi yn y gwaith - gwnaeth Ahmed ei herio a dweud bod ei char yn y maes parcio. Pan heriodd rheolwyr ymddygiad Ahmed, dywedodd nad oedd e erioed wedi dweud unrhyw beth o natur rywiol.

Cafodd Ahmed ei wneud yn destun gorchymyn atal stelcio ar ôl hynny. Credir mai dyma’r gorchymyn cyntaf ar gyfer achos o stelcio gan ddieithryn yng Nghaerdydd a'r Fro.

Torrodd amodau’r gorchymyn hwn pan ddilynodd un o'r dioddefwyr ar y cyfryngau cymdeithasol.

Dywedodd y Ditectif Gwnstabl Poppy Gosling, y swyddog ymchwilio: "Mae Ahmed yn ddyn sy’n peri pryder, a gafodd ffantasïau am ei ddioddefwyr a wnaeth iddynt deimlo’n ofnus ac yn fregus yn eu lle gwaith, a thu allan i’r gwaith hefyd.

“Ni allaf ond canmol a diolch i'r dioddefwyr am eu hyder wrth roi gwybod am ei ymddygiad. Rwy'n ddiolchgar am eu hamynedd drwy gydol yr achos llys a gobeithio y bydd ei gyfnod yn y carchar yn helpu i roi rhywfaint o heddwch iddynt.”