Ymgyrch blismona yn targedu beiciau modur a beiciau oddi ar y ffordd anghyfreithlon yn Abertawe

Mae 16 o feiciau modur a beiciau oddi ar y ffordd wedi cael eu hatafaelu ledled Abertawe yn rhan o ymgyrch blismona ddiweddar.

Ymgyrch sy'n gwasgu’n dynn ar bobl sy’n defnyddio beiciau oddi ar y ffordd mewn ffordd anghyfreithlon a gwrthgymdeithasol, ceir/beiciau wedi'u dwyn, a delio mewn cyffuriau yw Ymgyrch Akalat - sef problemau sy'n rhoi mwy o bwysau ar yr heddlu yn Abertawe. Mae'r problemau hyn yn cael effaith niweidiol ar ein cymunedau, gyda thrigolion yn cyfeirio atynt yn gyson fel materion sy'n cael effaith negyddol ar ansawdd bywyd, diogelwch y cyhoedd a hyder mewn plismona.

Defnyddiodd swyddogion awyren ag adenydd sefydlog Gwasanaeth Awyr Cenedlaethol yr Heddlu yn ystod yr ymgyrch ddydd Gwener 24 Ebrill, a gwelsant nifer o feiciau oddi ar y ffordd/anghyfreithlon o gwmpas Abertawe. Dilynodd Gwasanaeth Awyr Cenedlaethol yr Heddlu y beiciau hyn nes i’r gyrwyr gael eu dal yn ddiogel.

Yn rhan o’r gweithgarwch diweddaraf o dan Ymgyrch Akalat, llwyddwyd i sicrhau’r canlyniadau canlynol:

• Atafaelwyd 16 o feiciau modur / beiciau Sur-Ron / beiciau oddi ar y ffordd (Penlan - 8 / Dinas - 3 / Townhill - 3 / Treforys - 2)
• Lluniwyd 14 cais i’w hanfon drwy’r post mewn cysylltiad â sawl trosedd, gan gynnwys gyrru'n beryglus, meddu ar gyffuriau, a gyrru heb yswiriant.
• Cafodd 8 unigolyn eu stopio a'u chwilio

Roedd sawl un o'r 16 beic a atafaelwyd yn feiciau oedd wedi cael eu dwyn.

Dywedodd Cwnstabl yr Heddlu Connor Sumner-Jones o Uned Cudd-wybodaeth Abertawe a Chastell-nedd Port Talbot:

“Ar y cyfan, roedd Ymgyrch Akalat yn llwyddiannus iawn. Mae gweithgarwch yr heddlu yn yr ymgyrch hon wedi helpu i fynd i’r afael â materion sydd wedi bod yn bla ar y cymunedau hyn yn Abertawe, ac mae wedi adfer ymddiriedaeth a hyder galwyr 999 a 101 yn yr heddlu, sydd wedi ein gweld yn gweithredu yn sgil y wybodaeth a gawn ganddynt a chyflawni canlyniadau.”

Dywedodd yr Arolygydd Andrew Hedley:

“Dyma enghraifft o waith gwych a dull rhagorol o ddatrys problemau fydd yn anfon neges glir i'r rhai sy'n defnyddio beiciau a beiciau modur mewn ffordd anghyfreithlon neu wrthgymdeithasol yn y cyfnod cyn yr haf. Bydd y gwaith tarfu a welwyd yn ystod yr ymgyrch hon yn gwneud gwahaniaeth gwirioneddol yn y cymunedau yr effeithir arnynt a bydd yn helpu i leihau'r galw ar wasanaethau ar lefel ehangach.

“Neilltuwyd llawer o amser ac oriau plismona i gynllunio a chynnal yr ymgyrch hon sy'n mynd i'r afael â materion sy'n bwysig iawn i'r gymuned leol.

“Ochr yn ochr ag Ymgyrch Lathyrus, mae'r ymgyrch hon yn anfon neges ein bod yn gwrando ar bryderon ein cymunedau ac yn canolbwyntio ar ymdrin â’r troseddau hyn.

"Byddwn yn parhau i gynnal ymgyrchoedd o natur debyg yn aml dros y misoedd nesaf."