Carcharu grŵp o ddynion o Western-super-Mare am losgi bwriadol

Mae pedwar dyn o Western-super-Mare wedi cael eu carcharu ar ôl ymosod ar dŷ yn Stryd Protheroe, Glynrhedynog, drwy ei losgi.

Ymosododd Connor Pitt, 24 oed, Auryn Gustur, 19 oed, Alfie Wheeler, 19 oed, a Lewis Manito, 33 oed, ar gartref mam-gu 82 oed oherwydd fendeta troseddol, o dan gyfarwyddyd grŵp troseddau cyfundrefnol wedi’i leoli y tu allan i'r DU.

 

Ychydig ar ôl 11pm ar 27 Gorffennaf 2025, gyrrodd Storm Truman, 19 oed o Western-super-Mare, ei Seat Ibiza gwyn o ardal Western-super-Mare i stryd yng Nglynrhedynog gyda Wheeler a Gustur yn y cerbyd. Yno, fe wnaethant gyfarfod â Pitt, a gafodd ei yrru i ardal de Cymru gan Lewis Manito. Ni chafodd y car a ddefnyddiwyd gan Manito ei adfer.

Roedd gan y gang ddau gan petrol. Aeth Pitt i mewn i'r Seat Ibiza, a gyrrodd Truman y tri dyn i Stryd Protheroe er mwyn iddynt gyflawni'r ymosodiad yn ystod oriau mân y bore ar 28 Gorffennaf. Rhoddwyd gwybod i'r heddlu am y tân am 01:25am, ac roedd y pedwar dyn yn y ddalfa erbyn 01:50am.

Dangosodd lluniau teledu cylch cyfyng Wheeler a Pitt yn agosáu at y cyfeiriad gyda chaniau petrol gwyrdd yn eu llaw, wrth i Gustur ddefnyddio ei ffôn i ddarlledu'r ymosodiad.

Defnyddiwyd tanwydd a lledaenodd y tân i ochr flaen y tŷ a'r ceir y tu allan i'r cyfeiriad yn syth. Roedd y dioddefwr oedrannus yn cysgu lawr grisiau ond fe wnaeth sŵn y gwydr yn torri ei dihuno. Gellir ei chlywed yn sgrechian ar y teledu cylch cyfyng wrth i'r tŷ fynd ar dân.

Diolch i gymorth gan gymdogion a swyddogion, llwyddodd y dioddefwr i adael y tŷ yn ddiogel, wrth i'r pedwar dyn ffoi o'r lleoliad. Cyrhaeddodd swyddogion y stryd yn fuan ar ôl hynny a symud trigolion o’u cartrefi. Cyrhaeddodd y gwasanaeth tân a chafodd digwyddiad difrifol ei gyhoeddi yn ddiweddarach. 

Achoswyd gwerth tua £650,000 o ddifrod i dri eiddo, cynnwys y tri eiddo, a char.

Cynhaliodd swyddogion ymholiadau teledu cylch cyfyng ar unwaith a gwelsant fod y tân wedi'i gynnau'n fwriadol. Sylwodd swyddogion ar forthwyl torri gwydr i'w ddefnyddio mewn argyfwng ar y stryd a gwnaethant ei atafaelu.

Dywedodd tystion eu bod wedi gweld car amheus yn y stryd eiliadau cyn y tân, a llwyddon nhw i roi rhan o'r rhif cofrestru i'r heddlu.

Tra oedd y digwyddiad yn mynd yn ei flaen, gwelodd swyddog plismona’r ffyrdd oedd ar batrôl ac yn gyrru ar hyd yr A470 tuag at Gyfnewidfa Coryton y Seat Ibiza gwyn. Roedd y swyddog wedi cael gwybod bod y car wedi teithio o ardal Gwlad yr Haf yn ddiweddar, lle'r oedd y cerbyd wedi’i gofrestru, i gymoedd y Rhondda, a'i fod wedi dychwelyd yn fuan iawn wedyn. Dangosodd gwybodaeth fod y cerbyd yn ymwneud â chyflenwi cyffuriau rheoledig.

Defnyddiwyd cadwyn bigog i stopio'r car ac fe gafodd y bobl yn y cerbyd eu harestio. Roedd machete, morthwyl, menig a balaclafa yn y car. Gwelwyd hefyd fod rhywun wedi rhoi cyfeiriad Stryd Protheroe yn nyfais llywio lloeren y Seat.

Wrth ddadansoddi data o'r ffonau symudol a gafodd eu hatafaelu o'r Seat Ibiza, nodwyd bod Lewis Manito wedi bod yn rhan o'r ymosodiad. Fe'i harestiwyd gan heddlu Avon a Gwlad yr Haf ym mis Awst 2025.

• Plediodd Pitt yn euog i gynnau tân yn fwriadol gyda'r bwriad o beryglu bywyd a chafodd ei ddedfrydu i 18 mlynedd.
• Plediodd Gustur yn euog i gynnau tân yn fwriadol gyda'r bwriad o beryglu bywyd a chafodd ei ddedfrydu i 15 mlynedd a 6 mis.
• Plediodd Wheeler yn euog i gynnau tân yn fwriadol gyda'r bwriad o beryglu bywyd a bod ag eitem lafnog yn ei feddiant (mewn perthynas â'r machete a ganfuwyd yn y car wrth iddo gael ei arestio). Cafodd ei ddedfrydu am 13 mlynedd.
• Plediodd Manito yn euog i gynnau tân yn fwriadol gan beryglu bywyd yn ddiofal a gwyrdroi cwrs cyfiawnder. Cafodd ei ddedfrydu i 9 mlynedd.

Cafwyd Storm Truman yn ddieuog o gynnau tân yn fwriadol.

Dywedodd y Ditectif Arolygydd Owain Morrison, yr Uwch-swyddog Ymchwilio:

“Roedd hwn yn ymosodiad llwfr ar gartref menyw 82 oed a gafodd ei drefnu a'i gyfarwyddo gan droseddwr, a hynny oherwydd dyled wedi’i chysylltu ag aelod o deulu’r dioddefwr.  Roedd y dioddefwr yn gwbl ddiniwed.
“Gwnaeth y rhai a gyflawnodd yr ymosodiad wneud hynny er budd ariannol. Nid oeddent yn poeni dim am sut y byddai'n effeithio ar y person yn y tŷ na'r cymdogion. Bydden nhw wedi clywed y dioddefwr yn sgrechian wrth iddynt gynnau'r tân a rhedeg i ffwrdd. Dim ond lwc oedd hi na chafodd neb eu lladd yn yr ymosodiad yma.
“Diolch i broffesiynoldeb ein Huned Plismona'r Ffyrdd, cafodd pedwar dyn eu harestio'n gyflym wrth iddynt deithio i gyfeiriad yr M4.
“Gweithiodd tîm o ymchwilwyr ymroddedig yn ddiflino i gasglu tystiolaeth allweddol ac adnabod unigolion eraill oedd yn rhan uniongyrchol o'r ymosodiad er mwyn dod â nhw o flaen eu gwell.
“Hoffwn ddiolch i DC Cath Moore, y swyddog a fu'n ymwneud â'r achos, am y gofal a'r sylw a roddwyd wrth gasglu tystiolaeth gymhellol i Wasanaeth Erlyn y Goron gael ei chyflwyno yn y llys, gan fod hynny wedi arwain at bledion euog.
“Yn anad dim, hoffwn ddiolch i'r dioddefwr yn yr achos hwn, a'i theulu, am eu dewrder a'u hamynedd wrth i ni ymchwilio i'r mater.
“Hoffwn roi sicrwydd i'r gymuned leol bod yr ymchwiliad i ddod o hyd i'r person a gynlluniodd yr ymosodiad hwn, a'i ddwyn i gyfrif, yn parhau.”