Carcharu dyn o Ferthyr am droseddau dwyn o siopau

Mae troseddwr manwerthu mynych wedi cael ei garcharu yn dilyn ymchwiliad gan dîm Plismona yn y Gymdogaeth Merthyr.

 Cafodd Daniel Giles, 30 oed o Ferthyr Tudful, ei ddedfrydu i 11 mis yn y carchar ar ôl ymddangos gerbron Llys Ynadon Merthyr ddydd Mercher 15 Ebrill.

 Cafodd Giles ei ddal ar ôl iddo dargedu busnesau ar Ystâd Ddiwydiannol Pengarnddu ym Merthyr Tudful dro ar ôl tro. Yn ogystal â bod yn wrthgymdeithasol, roedd ei weithredoedd parhaus yn cael effaith negyddol sylweddol ar fusnesau lleol a'r gymuned ehangach.

 Cafodd Giles Hysbysiad Diogelu Cymunedol o dan y Ddeddf Ymddygiad Gwrthgymdeithasol, Troseddu a Phlismona 2014 hefyd. Yn rhan o'r Hysbysiad, mae Giles wedi cael ei wahardd rhag mynd i'r safleoedd manwerthu canlynol ym Merthyr Tudful.

• Ystâd Ddiwydiannol Pengarnddu, Dowlais Top.
• Mae'n rhaid iddo beidio â mynd i mewn i unrhyw safle manwerthu yn Ystâd Ddiwydiannol Pengarnddu, Dowlais Top, gan gynnwys ond heb fod yn gyfyngedig i ASDA a B&M, boed hynny ar ei ben ei hunan neu yng nghwmni pobl eraill.
• Mae'n rhaid iddo beidio â loetran, aros neu geisio cael mynediad i'r meysydd parcio, ardaloedd llwytho na thir o gwmpas sy'n gysylltiedig ag unrhyw uned fanwerthu ar Ystâd Ddiwydiannol Pengarnddu, Dowlais Top.

Dywedodd Cwnstabl yr Heddlu Ashton Riden o'r Tîm Cymdogaeth Fwy Diogel:

“Rydym yn gweithio gyda manwerthwyr a busnesau lleol ym Merthyr Tudful a Chynon i'w diogelu rhag troseddau ac ymddygiad gwrthgymdeithasol gan unigolion fel Giles.

 “Nid troseddau heb ddioddefwyr yw troseddau yn erbyn eiddo manwerthu - maent yn cael effaith ddifrifol ar weithwyr siop a pherchnogion busnesau, gan arwain yn aml at golledion ariannol ac achosi i bobl deimlo’n ofnus a dan fygythiad. Byddwn yn cymryd camau cadarn i adfer ymddiriedaeth a hyder mewn plismona yn ein cymunedau.”

 Dywedodd Rhingyll yr Heddlu Gareth Jones o'r Tîm Cymdogaeth Fwy Diogel:

 “Mae hyn yn dangos pa mor galed mae’r tîm yn gweithio, ond nid dyna ddiwedd ein gwaith. Byddwn yn parhau i weithio ochr yn ochr â manwerthwyr a chymunedau i sicrhau bod troseddwyr fel Giles yn cael eu dwyn gerbron y llysoedd.”