Carcharu pâr o Ferthyr am gyflenwi cocên

Mae Matthew James, 39 oed, o Ferthyr Tudful, wedi cael ei ddedfrydu i bum mlynedd a 239 o ddiwrnodau yn y carchar yn dilyn ei euogfarn am gyflenwi cocên. Mae Leah Thomas, 26 oed, o Ferthyr Tudful, wedi cael ei dedfrydu i dair blynedd yn y carchar yn dilyn ei heuogfarn am gyflenwi cocên.

Cawsant eu dedfrydu ddydd Gwener 16 Ionawr 2026 yn Llys y Goron Merthyr Tudful, lle plediodd James a Thomas yn euog i ymwneud â chyflenwi cocên.

Mae'r achos yn deillio o ymchwiliad gan Heddlu De Cymru a ddechreuodd â swyddogion yn monitro dau rif ffôn symudol, a oedd yn anfon negeseuon mewn swp yn hysbysebu gwerthu cocên. Anfonwyd dros 2,000 o negeseuon testun o'r ddau ffôn, a oedd yn perthyn i James a Thomas.

Ddydd Mawrth, 8 Gorffennaf 2025, gwelodd swyddogion o'r uned troseddau cyfundrefnol gerbyd Thomas wedi'i barcio y tu allan i gyfeiriad James ym Merthyr Tudful. Gwyliodd swyddogion am ychydig wrth i'r pâr adael y tŷ, cyn mynd ati i'w harestio.

Yn ystod chwiliad, atafaelwyd ffôn a oedd gan Thomas, a daethpwyd o hyd i ffôn arall yng nghar Thomas yn ddiweddarach. Roedd gan y ddau ffôn gardiau sim a oedd yn gysylltiedig â'r llinell gyffuriau yr oeddent yn ei rhedeg.  Daeth swyddogion o hyd i gannoedd o negeseuon ar y ffonau a oedd yn cysylltu Thomas a James â chyflenwi cocên rhwng mis Chwefror a mis Gorffennaf 2025.

Dywedodd y Rhingyll Andrew Carver "Mae Matthew James a Leah Thomas yn bâr a oedd yn gweld cyffuriau Dosbarth A fel cynllun i wneud arian yn gyflym.

“Mae cyffuriau yn bla ar ein cymunedau ac roeddent yn chwarae eu rhan yn dod â'r gofid hwn i strydoedd Merthyr Tudful.

“Mae mynd i'r afael â throseddau cyfundrefnol yn flaenoriaeth i Heddlu De Cymru a byddwn yn parhau i fynd ati'n ddiflino i fynd ar ôl troseddwyr er mwyn diogelu ein cymunedau rhag niwed.”