Carchar am 25 mlynedd i ddyn o ardal Abertawe am dreisio plant

Mae dyn o Abertawe wedi cael dedfryd o 25 mlynedd o garchar ar ôl cael ei ganfod yn euog o dreisio dwy ferch o dan 16 oed yn y gorffennol.

Roedd David Lake, 57 oed o Lansamlet, wedi ymosod sawl gwaith ar y merched, sydd bellach yn oedolion.

Ym mis Ebrill, cafwyd Lake yn euog o un achos o dreisio merch o dan 16 oed, pedwar achos o ymosod yn anweddus ar ferch o dan 14 oed, un achos o gael cyfathrach rywiol anghyfreithlon gyda merch o dan 13 oed, ac un achos o geisio ymosod yn anweddus ar ferch o dan 16 oed.

Mae bellach wedi cael ei ddedfrydu i 25 mlynedd yn y carchar a bydd ei enw ar y gofrestr troseddwyr rhyw am oes.

Dywedodd y Ditectif Gwnstabl Sioned Davies:

“Roedd dioddefwyr David Lake yn eithriadol o ddewr a chryf yn rhoi gwybod i rywun am y troseddau yr oeddent wedi’u dioddef, yn enwedig o ystyried bod cymaint o flynyddoedd wedi mynd heibio ers y troseddau hynny.

“Mae’r ymchwiliad hwn, sydd wedi arwain at ddwyn David Lake gerbron y llysoedd yn y pen draw, wedi bod yn hir ac yn gymhleth, ac mae difrifoldeb ei droseddau’n cael ei adlewyrchu gan y ddedfryd hir a roddwyd iddo.

“Dim ond ar ôl i David Lake gael ei anfon i’r carchar am drosedd arall y stopiodd ymosod ar ei ddioddefwyr. Rydym yn gobeithio na fydd e byth yn cyflawni trosedd arall ar ôl derbyn y ddedfryd hon.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.