Carcharu dyn o Flaengwynfi am yrru'n beryglus, llosgi bwriadol a defnyddio cyllell

Mae dyn o Gastell-nedd Port Talbot wedi cael ei garcharu am ei ymddygiad peryglus a bygythiol tuag at fenyw.

Fe wnaeth David Smith, 43 oed o Flaengwynfi, chwifio cyllell at y fenyw tra oedden nhw’n gyrru mewn ceir gwahanol yn agos at gyfeiriad y dioddefwr ar 2 Mawrth eleni. Aeth Smith ymlaen i ddilyn car y fenyw, cyn gyrru o’i blaen yn beryglus a mynd allan o’i gar i chwifio’r gyllell ati eto.

Digwyddodd hyn sawl tro, gyda Smith yn gwyro ar draws y ffordd mewn ymgais i daro car y dioddefwr oddi ar y ffordd. Yn y pen draw, roedd yn rhaid i’r dioddefwr yrru i mewn i ffos a rhedeg i ffwrdd er mwyn ceisio dianc rhag Smith. 

Yn dilyn y digwyddiad, fe wnaeth Smith roi garej y dioddefwr ar dân yn fwriadol.

Plediodd yn euog i losgi bwriadol a diofal ynglŷn â pheryglu bywyd, gyrru cerbyd modur yn beryglus, dau gyhuddiad o fod â llafn cyllell/eitem lafnog finiog yn ei feddiant mewn man cyhoeddus, achosi difrod troseddol i eiddo, ac anfon neges fygythiol.

Mae wedi cael ei ddedfrydu i bedair blynedd a phedwar mis yn y carchar.

Dywedodd y Ditectif Ringyll Jonathan Holding:

“Roedd ymddygiad David Smith tuag at y dioddefwr yn fygythiol a dychrynllyd dros ben ac ni ellir goddef ymddygiad o’r fath.

“Does wybod pa mor bell y byddai Smith wedi mynd i godi ofn ar ei ddioddefwr. Yn ffodus iawn, daeth y digwyddiad i ben cyn i unrhyw un gael ei anafu.

“Cyfres o ddigwyddiadau oedd hyn, nid eiliad o wallgofrwydd, ac mae hyd y ddedfryd yn adlewyrchu hynny."