Dyn wedi'i garcharu ar ôl i'r heddlu ddod o hyd iddo’n cuddio mewn cwpwrdd mewn ffatri ganabis

Mae dyn wedi cael ei garcharu ar ôl i’r heddlu weithredu gwarant mewn ffatri ganabis yn Abertawe a’i ddarganfod yn cuddio mewn cwpwrdd.

Daeth swyddogion o hyd i Antonjo Kodheli, 42 oed heb gartref sefydlog, mewn eiddo ar Bryn Y Môr Crescent, Uplands, wrth iddynt chwilio'r cyfeiriad.

Darganfuwyd cyfanswm o 539 o blanhigion mewn wyth ystafell yn yr eiddo.

Plediodd Kodheli yn euog i ymwneud â chynhyrchu cyffur rheoledig Dosbarth B. Mae wedi cael ei ddedfrydu i wyth mis yn y carchar.

Dywedodd y Rhingyll Luke Tucker:

“Mae'n hynod o siomedig gweld dro ar ôl tro bod cyfeiriadau yn Abertawe yn cael eu defnyddio i gynnal gweithgareddau anghyfreithlon, gan gynnwys tyfu cyffuriau.

“Antonjo Kodheli yw’r diweddaraf mewn rhestr hir o droseddwyr i ddarganfod nad yw bod yn rhan o’r fasnach cyffuriau anghyfreithlon yn werth y risg. Er y gellir dadlau bod cyffuriau mwy peryglus yn bodoli, mae'r arian a gynhyrchir drwy ffatrïoedd canabis yn aml yn mynd tuag at weithgaredd troseddol mwy difrifol byth, a dyna pam y byddwn bob amser yn gweithredu.”