Lansio Ymgyrch Adriatic ar gyfer 2026 i ymdrin ag ymddygiad gwrthgymdeithasol yn Aberafan

Lansiwyd Ymgyrch Adriatic y mis hwn, sef ymgyrch sy'n mynd i'r afael â phroblemau ymddygiad gwrthgymdeithasol ar lan môr Aberafan.

Yn rhan o’r ymgyrch, bydd Heddlu De Cymru yn gweithio'n agos ar y cyd â Chyngor Castell-nedd Port Talbot, Castell-nedd Port Talbot Mwy Diogel, Sefydliad Cenedlaethol Brenhinol y Badau Achub (RNLI) ac asiantaethau eraill er mwyn gwneud glan y môr yn lle pleserus y gall pawb ei fwynhau.

Ar adegau drwy gydol yr haf, bydd gorchymyn gwasgaru Adran 35 yn cael ei awdurdodi ar y traeth, sy'n golygu y bydd pobl sy'n rhan o ymddygiad gwrthgymdeithasol yn gorfod gadael yr ardal.

Yr ardal ddynodedig i'w gadael yw: Y Traeth cyfan gan gynnwys Y 'Traeth Bychan', Pier y Gogledd, ac ardal y promenâd i gyd gan gynnwys busnesau ar hyd y promenâd fel Remo's a Franco's i Draeth Bae Baglan, gan gynnwys y twyni ar y traeth hwn.

Dywedodd yr Arolygydd Andrew Price:

“Nod Ymgyrch Adriatic yw atal problemau ymddygiad gwrthgymdeithasol cyn iddynt ddigwydd. Yn rhan o'r gwaith amlasiantaethol hwn, byddwn yn ymgysylltu â'r cyhoedd ochr yn ochr â'n partneriaid a hyrwyddo cyfrifoldeb ar y cyd er mwyn cadw'r traeth yn ddiogel a sicrhau nad oes unrhyw weithgarwch anghyfreithlon.

"Trwy gyfuno ein hadnoddau a chydweithio gyda phartneriaid, gallwn atal problemau rhag gwaethygu a chynnig cymorth i drigolion yr effeithir arnynt."

Os ydych wedi gweld rhywun yn ymddwyn mewn modd gwrthgymdeithasol, rhowch wybod i ni: Riportio ymddygiad gwrthgymdeithasol | Heddlu De Cymru