Arestio dros 500 o bobl a dedfrydu 69 o ddelwyr cyffuriau i gyfanswm o 100 o flynyddoedd yn y carchar

Lansiwyd Clirio, Dal, Adeiladu yn Butetown ar ddiwedd 2024 mewn ymateb i gynnydd mewn troseddau cyfundrefnol difrifol gydag adroddiadau dyddiol am ddelio cyffuriau, troseddau treisgar ac ymddygiad gwrthgymdeithasol cysylltiedig.

Mae'n gynllun tri cham a gefnogir gan y Swyddfa Gartref sy'n clirio troseddwyr cyfundrefnol a'u partneriaid o ardal drwy weithgarwch tarfu ac ymlid diflino.

Wedyn, caiff yr ardal ei gwneud yn fwy sefydlog gyda phatrolau amlwg gan yr heddlu a mesurau gan asiantaethau partner i greu cymuned fwy gwydn sydd wedi'i grymuso, ac sy'n llai agored i gamfanteisio gan grwpiau troseddau cyfundrefnol.

Mae'r canlynol wedi digwydd fel rhan o'r cam Clirio yn Butetown, dan arweiniad y Tîm Plismona yn y Gymdogaeth lleol:

• Arestiwyd 518 o bobl am bob math o droseddau.
• Cyhuddwyd 69 o ddelwyr cyffuriau o droseddau masnachu mewn cyffuriau.
• Rhoddwyd 100 o flynyddoedd o ddedfrydau o garchar, a disgwylir mwy wrth i faterion fynd drwy'r llysoedd.
• Chwalwyd tair “llinell gyffuriau” fawr.
• Atafaelwyd symiau sylweddol o gyffuriau Dosbarth A a Dosbarth B, arian parod, arfau a pharaffernalia sy'n gysylltiedig â chyffuriau.

Dywedodd y Comander Rhanbarthol ar gyfer Caerdydd, y Prif Uwch-arolygydd Marc Attwell:

“Ymgyrch bartneriaeth yw Clirio, Dal, Adeiladu, ond mae rhan yr heddlu yn Butetown wedi arwain at arestio dros 500 o bobl am amrywiaeth o droseddau.

“Ond yn bwysicach, mae'r gymuned yn dweud wrthym eu bod yn teimlo'n ddiogel.

“Yn ddiweddar, aeth aelod o'r gymuned at aelod o'r tîm plismona lleol gan ddweud ‘am y tro cyntaf ers 20 mlynedd, rwy'n teimlo'n ddigon diogel i gerdded o gwmpas fy nghymuned’, ac mae hynny'n deyrnged i'r gwaith y mae'r swyddogion hyn yn ei wneud.”

Ychwanegodd yr Arolygydd Gareth Handy:

“Drwy ein dull Clirio, Dal, Adeiladu, rydym yn ymrwymedig i wneud gwahaniaeth parhaus i gymuned Butetown.

“Hoffwn ddiolch i'n partneriaid a phreswylwyr am eu cymorth a'u cydweithrediad parhaus.

“Nid ymdrech fyrdymor yw hon — mae'n ymwneud ag ymgysylltu'n barhaus a mynd i'r afael â materion gyda'n gilydd. Drwy weithio mewn partneriaeth, gallwn adeiladu cymdogaethau cryfach a mwy diogel ar gyfer Butetown.”