Carchar i ddyn o ardal Beddau ar ôl cael ei ddyfarnu'n euog o dreisio menyw

Mae dyn o ardal Beddau wedi cael ei garcharu ar ôl i reithgor ei gael yn euog o dreisio.

Gwnaeth Kyle Plummer, 32 oed o Aberpennar, dreisio ei ddioddefwr mewn eiddo yn ardal Beddau yn 2023. Plediodd Plummer yn ddieuog i un cyhuddiad o dreisio, ond fe'i cafwyd yn euog yn dilyn achos llys dros gyfnod o dri diwrnod yn Llys y Goron Caerdydd ym mis Ebrill 2026.

Mae wedi cael dedfryd estynedig o chwe blynedd a chwe mis yn y carchar, ac mae hefyd wedi cael ei wneud yn destun gorchymyn atal am ddeng mlynedd.

Dywedodd y Ditectif Gwnstabl Davies:

“Hoffwn ddiolch i'r dioddefwr yn yr achos hwn am roi gwybod i'r heddlu ac am fod yn ddewr drwy gydol yr ymchwiliad hwn. Diolch iddi hi, rydym wedi llwyddo i euogfarnu dyn sydd, yn amlwg, yn fygythiad i fenywod. Rwy'n gobeithio y bydd hyn yn ei helpu i symud ymlaen mewn ffordd fwy cadarnhaol a rhoi rhywfaint o gysur iddi.

“Os ydych chi wedi dioddef trosedd rywiol, rydym yn eich annog i roi gwybod i'r heddlu cyn gynted â phosibl. Byddwch yn cael eich cefnogi a bydd swyddogion yn trin pob achos gyda sensitifrwydd a phroffesiynoldeb.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.