Carcharu menyw o Ben-y-bont ar Ogwr am nifer o droseddau dwyn o siopau

Mae troseddwr manwerthu mynych wedi cael ei garcharu yn dilyn ymchwiliad gan dîm Plismona yn y Gymdogaeth Pen-y-bont ar Ogwr.

Cafodd Emma Faulkner, 48 oed o Ben-y-bont ar Ogwr, ei dedfrydu i 10 mis yn y carchar ar ôl ymddangos gerbron Llys Ynadon Caerdydd ddydd Mercher 6 Mai.

Cafodd Faulkner ei dal ar ôl iddi dargedu busnesau ledled Pen-y-bont ar Ogwr dro ar ôl tro dros yr wyth mis diwethaf. Roedd hyn yn cynnwys dwyn gwerth £1,500 o eitemau o The Cosmetic Store yn McArthur Glen, £40 o Poundland yn Stryd Adare, a chanhwyllau gwerth £30 o siop Yankee Candle, yn ogystal â nifer o achosion eraill o ddwyn o siopau.

Cafodd ei dedfrydu hefyd am fod yn feddw ac afreolus mewn man cyhoeddus. Mae swyddogion wedi defnyddio eu pwerau ychwanegol i wneud cais am orchymyn ymddygiad troseddol am gyfnod o ddwy flynedd fydd yn gwahardd Faulkner rhag mynd i mewn i siopau sydd wedi gorfod dioddef ei hymddygiad. Mae ei chi hefyd wedi cael ei gymryd oddi wrthi, ac mae Faulkner wedi cael ei wahardd rhag cadw anifeiliaid am bum mlynedd.

Dywedodd y Rhingyll Daniel Parry o Dîm Plismona yn y Gymdogaeth Pen-y-bont ar Ogwr:  “Mae troseddau manwerthu mynych ac ymddygiad gwrthgymdeithasol yn cael effaith uniongyrchol ar ein cymunedau ac ar fusnesau lleol. I fod yn gwbl glir - bydd y rhai sy'n dewis troseddu dro ar ôl tro yn cael eu hadnabod, eu targedu a byddwn yn ymdrin â nhw yn gadarn. Bydd ein swyddogion yn gweithio'n ddiflino i fynd ar ôl y rhai sy'n gyfrifol, a byddant yn defnyddio'r holl bwerau sydd ar gael iddynt i ddwyn yr unigolion hynny i gyfrif.”