Carchar i ddeliwr cyffuriau a gafodd ei arestio yn y maes awyr wrth iddo ddychwelyd o'i wyliau

Cafodd Kane Evans, 29 oed, ei arestio gan yr heddlu ym maes awyr Bryste ar 29 Ionawr, 2026, ar ôl dychwelyd o wyliau yn Cyprus.

Ar y pryd, roedd yn destun ymchwiliad gan swyddogion o Dîm Troseddau Cyfundrefnol Caerdydd a'r Fro.

Yn ôl ym mis Tachwedd 2025, roedd mewn fflat yn Mill Road pan wnaeth swyddogion o'r Tîm Plismona yn y Gymdogaeth lleol weithredu gwarant o dan y Ddeddf Camddefnyddio Cyffuriau.

Wrth i swyddogion dorri i mewn, cafodd bag cefn yn cynnwys crac cocên ei daflu allan o ffenestr ystafell wely lle y gwnaethant ddod o hyd i Evans a'i arestio.

Atafaelodd y swyddogion ddau ffôn o'r cyfeiriad, a chanfuwyd bod un ohonynt yn llinell gyffuriau a oedd yn gysylltiedig ag ymchwiliad arall.

Roedd swyddogion yn aros am Kane ar y rhedfa wrth iddo gamu oddi ar yr awyren. Cafodd ei arestio ac aethpwyd ag ef i'r ddalfa, lle y cafodd ei gyhuddo o ymwneud â chyflenwi crac cocên.

Plediodd yn euog i hyn, a ddydd Mercher 13 Mai, cafodd ei garcharu yn Llys y Goron Caerdydd am 40 mis.

Dywedodd y Ditectif Gwnstabl Jon Grenville-Roberts:

“Llwyddodd ein swyddogion arbenigol i gysylltu ymchwiliadau gwahanol i brofi bod Evans wedi bod yn delio cyffuriau. Ynghyd â'r cyffuriau y daethpwyd o hyd iddynt yn ystod y warant, roedd hynny wedi ein galluogi i baratoi ffeil gref o dystiolaeth a arweiniodd at ble euog. Efallai ei fod wedi meddwl ei fod wedi osgoi cael ei ddal, ond newidiodd ei feddwl yn gyflym wrth weld swyddogion yn aros amdano yn y maes awyr.”

Sceptre

Nid oedd gan Evans unrhyw gyllyll nac arfau yn ei feddiant, ac ni chafodd ei ddyfarnu'n euog o drosedd cyllyll, ond cafodd ei arestio yn ôl ym mis Tachwedd 2025, yn ystod Sceptre – sef menter gan yr heddlu i fynd i'r afael â throseddau cyllyll sy'n aml yn gysylltiedig â delio cyffuriau. Yn ystod yr ymgyrch honno, cafodd cyfanswm o 15 o bobl eu harestio a daethpwyd o hyd i 17 cyllell ar ôl gweithredu wyth gwarant ledled de Cymru.

Sy'n rhedeg ar hyn o bryd am un wythnos yn dechrau heddiw (18 Mai) – hefyd yn canolbwyntio'n gryf ar ymgysylltu â'r gymuned, gan addysgu pobl ifanc am beryglon cario cyllell, ynghyd â beth i'w wneud os byddant yn dod yn ymwybodol o rywun sy'n cario cyllell.

Dros y saith diwrnod nesaf, bydd timau plismona ledled de Cymru yn cynnal gweithgareddau fel cyrchoedd cyllyll a arweinir gan guddwybodaeth, defnyddio bwâu cyllyll mewn canolfannau trafnidiaeth, a sesiynau ymwybyddiaeth o droseddau cyllyll mewn partneriaeth ag ysgolion a chlybiau ieuenctid lleol.

Ymgyrch i fynd i'r afael â throseddau cyllyll

Ymgyrch sy'n mynd i'r afael â throseddau cyllyll yw 'Ddim yr Un', gyda'r nod o leihau nifer y troseddau cyllyll a nifer y bobl sy'n eu cyflawni yn ne Cymru.

Mae Heddlu De Cymru a'r Uned Atal Trais yn parhau i redeg yr ymgyrch er mwyn addysgu pobl ifanc am ganlyniadau cario cyllell.Gyda'n gilydd, rydym yn ymyrryd yn gynnar er mwyn mynd i'r afael â throseddau cyllyll gyda'r nod o leihau nifer y troseddau cyllyll a nifer y bobl sy'n eu cyflawni.