Diwrnod Hwyl i'r Teulu Heddlu De Cymru 2026: Ymunwch â ni!

Mae Diwrnod Hwyl i'r Teulu Heddlu De Cymru yn ôl unwaith eto eleni a bydd yn cael ei gynnal ddydd Sadwrn 6 Mehefin.

Hoffem eich gwahodd i’r digwyddiad, ym mhencadlys yr heddlu, Pen-y-bont ar Ogwr!

Mae bob amser yn ddiwrnod ardderchog, gyda llwyth o weithgareddau ac atyniadau, ac mae’r un peth yn wir eleni.

Mae’r digwyddiad am ddim, felly dyma gipolwg ar rai o’r pethau y byddwch yn eu gweld yno:

• Cŵn a'r ceffylau heddlu
• Ceir a beiciau'r heddlu
• Yr Uned Arfau Tanio
• Band a drymiau
• Rhwydweithiau staff

Bydd ardal gwisgo i fyny i blant hefyd, ac fe gewch gyfle i gwrdd â swyddogion, staff a gwirfoddolwyr a sgwrsio gyda nhw, yn ogystal â chymryd rhan mewn ‘prawf blip’, rhoi cynnig ar gymorth cyntaf, astudio sut i ddefnyddio adnoddau fforensig mewn safleoedd trosedd, defnyddio penset realiti rhithwir, chwarae gemau gardd, a llawer mwy!

Nodwch, byddwn yn ffilmio ac yn tynnu lluniau yn ystod y digwyddiad hwn a gall Heddlu De Cymru ddefnyddio'r rhain at ddibenion marchnata neu hyrwyddo.

Rydym hefyd wedi ateb rhai o’ch cwestiynau isod.

 

Mynediad

Digwyddiad AM DDIM yw hwn a fydd yn rhoi cyfle i chi gwrdd â'n swyddogion a'n staff a dysgu am yr hyn rydym yn ei wneud. Ni fydd angen i chi ddod ag unrhyw ddull adnabod gyda chi.

Mae'n digwydd ym mhencadlys Heddlu De Cymru, Heol y Bont-faen, Llangrallo Isaf, Pen-y-bont ar Ogwr, CF31 3SU.

 

Cyrraedd y digwyddiad

O’r gorllewin (Castell-nedd/Abertawe), gadewch yr M4 wrth gyffordd 37 a dilynwch yr arwyddion ar gyfer Pen-y-bont ar Ogwr. O’r dwyrain (Caerdydd), gadewch yr M4 wrth gyffordd 35 a dilynwch yr arwyddion ar gyfer Pen-y-bont ar Ogwr. Mae modd defnyddio’r A48 (o'r Bont-faen/Y Barri) a'r A473 (o Bencoed/Llanharan) i gyrraedd y pencadlys hefyd.

 

Trafnidiaeth gyhoeddus

Mae'n cymryd tua 20 munud i gerdded o orsaf reilffordd Pen-y-bont ar Ogwr i'n pencadlys.

Mae trenau uniongyrchol i Gaerdydd, Abertawe, Castell-nedd, Port Talbot, Y Barri, Llanilltud Fawr, Pont-y-clun, Llanharan, Pencoed a Maesteg, a thu hwnt.

Mae nifer o lwybrau bysiau lleol ym Mhen-y-bont ar Ogwr all fynd â chi i’r pencadlys hefyd.

 

Amseroedd cyrraedd

Bydd y Diwrnod Hwyl i'r Teulu rhwng 10am a 4pm. Noder: mae mynediad olaf am 3:30pm (ond ni fydd hynny’n rhoi llawer o amser i chi weld yr holl atyniadau sydd ar gael).

 

Parcio

Mae ychydig o leoedd parcio ar gael ar Kingsway ar Ystâd Ddiwydiannol Pen-y-bont ar Ogwr, CF31 3RY (what3words fersiwn Gymraeg: ///onglydd.slipio.cynnull; fersiwn Saesneg: ///shark.prom.stale):

Bydd arwyddion yn dangos y lleoedd parcio.

Gan fod nifer gyfyngedig o leoedd ar gael, gofynnwn i chi ddefnyddio trafnidiaeth gyhoeddus neu gerdded os oes modd.

Mae lleoedd parcio i Ddeiliaid Bathodyn Glas ar gael yn y maes parcio i Ymwelwyr o flaen y pencadlys (what3words fersiwn Gymraeg: ///cipio.llong.ynys; fersiwn Saesneg: ///voices.flying.clock):

 

Bwyd a diod

Bydd cyfle i chi brynu bwyd a diod o amrywiaeth o stondinau ar y safle. Bydd caffi Canolfan Ddysgu’r Heddlu ar agor hefyd. Mae croeso i chi ddod â'ch bwyd a'ch diod eich hun (dim alcohol), a chofiwch ddod â photeli dŵr – yn enwedig os bydd y tywydd yn braf.

 

Cŵn

Yn anffodus, ni chewch ddod â'ch cŵn eich hun (ac eithrio cŵn cymorth) gan y bydd ein cŵn heddlu’n bresennol ar y safle yn rhan o’r Diwrnod Hwyl i'r Teulu.

 

Ysmygu/fêpio

Gwaherddir ysmygu a fêpio ym mhob rhan o’r safle.

 

Teithiau tywys o amgylch y Ganolfan Treftadaeth

Mae teithiau’n digwydd drwy gydol y dydd, ond bydd angen archebu lle ymlaen llaw drwy e-bostio [email protected].

 

Niwroamrywiaeth

Rhwng 10am a 10.30am, ni fydd unrhyw seirenau na goleuadau yn cael eu defnyddio. Bydd ystafell dawel ym Mharth 3 hefyd, ac fe fydd ar gael drwy'r dydd.

 

Cyfleusterau eraill

Mae toiledau ac ystafell rhieni a phlant ar y safle.

 

Fideo a ffotograffiaeth

Byddwn yn ffilmio ac yn tynnu lluniau yn ystod y digwyddiad hwn a gall Heddlu De Cymru ddefnyddio'r rhain at ddibenion marchnata neu hyrwyddo.