“Dydw i ddim yn siŵr a fydda i byth yn dod dros yr hyn a wnaeth e i mi.” - Geiriau menyw a gafodd ei threisio gan Dean Edwards bron i 20 mlynedd yn ôl.
Cynnwys y prif erthygl
Mae Dean Edwards wedi cael ei garcharu am dreisio menyw bron i 20 mlynedd yn ôl.
Roedd y dioddefwr yn ddigon dewr i siarad â’r heddlu yn 2023 ar ôl dysgu bod Edwards yn y carchar am dreisio person arall.
Er i Edwards fynnu ei fod yn ddieuog, fe'i cafwyd yn euog yn dilyn treial yn Llys y Goron Caerdydd.
Cafodd Edwards ei ddedfrydu i wyth mlynedd yn y carchar ddydd Llun 11 Mai 2026 yn Llys y Goron Caerdydd, gyda chyfnod estynedig o bedair blynedd ar drwydded.
Cafodd y dyn 48 oed ei wneud yn destun gofynion hysbysiad troseddwr rhyw a gorchymyn atal am gyfnod amhenodol hefyd.
Clywodd y llys sut y gwnaeth Edwards dreisio'r fenyw yn ei thŷ tra oedd e dan ddylanwad cyffuriau ac alcohol.
Ni roddwyd gwybod i'r heddlu am y digwyddiad ar y pryd.
Mewn Datganiad Personol Dioddefwr i'r llys, disgrifiodd y dioddefwr yr effaith ddifrifol y mae'r digwyddiad wedi'i chael ar ei bywyd.
“Rwy wedi teimlo’n ofnadwy o euog am beidio â riportio’r digwyddiad i'r heddlu yn gynt.
“Pan ges i wybod am yr achosion eraill y mae Edwards yn gyfrifol amdanynt, allwn i ond meddwl efallai y gallwn i fod wedi helpu'r menywod eraill trwy fynd at yr heddlu yn gynt.
“Dydw i ddim yn siŵr a fydda i byth yn dod dros yr hyn a wnaeth e i mi. Dydw i ond yn gobeithio y galla i symud ymlaen gyda fy mywyd yn awr, gan wybod na fydd e'n gallu ymosod ar fenyw arall am beth amser o leiaf.”
Dywedodd y swyddog a fu'n ymwneud â'r achos, y Ditectif Gwnstabl Nick Young: “Mae’r dioddefwr wedi bod yn eithriadol o ddewr yn dod i siarad â ni pan wnaeth hi.
“Rwy'n gobeithio y bydd canlyniad yr achos llys yn rhoi rhywfaint o gysur iddi fod Edwards wedi cael ei ddal a bod ei dewrder wedi helpu i amddiffyn menywod eraill rhag niwed.
Hyd yn oed os yw amser wedi mynd heibio, nid yw hynny’n ein rhwystro rhag ymchwilio i droseddau o’r fath ac rydym yn annog dioddefwyr i roi gwybod am ddigwyddiadau.”
Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.
Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.
Os ydych chi wedi cael eich cam-drin yn rhywiol, ac nad ydych yn barod i roi gwybod amdano i'r heddlu eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.