Gwobr newydd o £10k am wybodaeth yn arwain at arestio Mohammed Ali Ege
Cynnwys y prif erthygl
Mae'r heddlu yn parhau i chwilio am Mohammed Ali Ege mewn cysylltiad â llofruddiaeth Aamir Siddiqi yng Nghaerdydd.
Mae'r elusen Crimestoppers wedi cynnig gwobr newydd o hyd at £10,000 am wybodaeth yn arwain at arestio Ege.
Mae'r heddlu yn chwilio amdano mewn cysylltiad â llofruddiaeth Aamir Siddiqi, 17 oed, a fu farw yn ei gartref yn Ninian Road, y Rhath ar 11 Ebrill 2010 ar ôl cael ei drywanu sawl gwaith.
Er bod dau ddyn wedi'u cael yn euog o'i lofruddio, a'u bod yn parhau i fwrw dedfryd oes yn y carchar, mae Heddlu De Cymru yn parhau i fod yn ymrwymedig i ddod o hyd i Mohammed Ali Ege a'i arestio.
Gwnaeth Ege, sy'n 46 oed erbyn hyn, ffoi i India cyn i'r heddlu allu ei arestio mewn cysylltiad â llofruddiaeth Aamir.
Yn 2013 cafodd ei arestio yn India ond wrth aros i gael ei estraddodi yn 2017, dihangodd o'r ddalfa yn India.
Mae ei leoliad presennol yn dal i fod yn anhysbys ond os caiff Mohammed Ali Ege ei arestio unrhyw le yn y byd, mae trefniadau ar waith i sicrhau y caiff Heddlu De Cymru ei hysbysu ar unwaith.
Mae Ege yn parhau i fod ar wefan 'Most Wanted' Crimestoppers lle y gellir dod o hyd i ragor o wybodaeth am wobr arian parod Crimestoppers.
Gofynnwn i unrhyw un sydd â gwybodaeth am ei leoliad i gysylltu â ni – a hynny er mwyn teulu Aamir sydd wedi ymddwyn yn urddasol drwy'r cyfan.
***Ni fydd gwybodaeth a roddir yn uniongyrchol i'r heddlu yn gymwys ar gyfer gwobr. Dim ond gwybodaeth a roddir i Crimestoppers drwy ddefnyddio'r ffurflen ddienw ar-lein na ellir ei holrhain yn www.crimestoppers-uk.org neu drwy rif rhadffon 0800 555 111 fydd yn gymwys***
Mae Crimestoppers yn annibynnol ar yr heddlu, ac mae'r elusen yn gwarantu anhysbysrwydd llwyr. Wrth ddefnyddio'r ffurflen ar-lein yn crimestoppers-uk.org, caiff cyfeiriad IP eich cyfrifiadur ei sgramblo, ei guddio, ac ni chaiff fyth ei olrhain. Pan fyddwch yn cysylltu â Crimestoppers, ni fydd yn cofnodi unrhyw ddata personol o gwbl – ni chaiff eich enw, eich rhif ffôn, eich cyfeiriad e-bost na'ch cyfeiriad IP eu cofnodi. Nid oes unrhyw beth i'w rannu, gan nad oes unrhyw beth yno.