Llofruddiaeth Shelley Davies – Rheithfarn euog
Cynnwys y prif erthygl
Mae dyn wedi'i gael yn euog o lofruddio Shelley Davies yng Nghaerau, Caerdydd.
Mae Kian Bateman o Gaerau, Caerdydd, hefyd wedi’i gael yn euog o achosi niwed corfforol difrifol yn fwriadol i bartner Shelley, David Bratcher.
Cafodd y gwasanaethau brys eu galw i Heol Trelái ychydig cyn 12.30am ddydd Sadwrn, 27 Medi 2025, yn dilyn adroddiad bod gyrrwr car wedi gwrthdaro â cherddwyr y tu allan i Glwb 4ydd Gwarchodlu Cartref Morgannwg.
Cafodd Shelley Davies, 38 oed, o Gaerau, ei hanafu'n ddifrifol yn ystod y digwyddiad ar ôl iddi gael ei tharo gan y car, ac er iddi gael gofal critigol, bu farw yn Ysbyty Athrofaol Cymru, Caerdydd, ddydd Sadwrn, 18 Hydref 2025.
Cafodd ei phartner, David Bratcher, 40 oed, a anafwyd yn ddifrifol hefyd, ei drin yn yr un ysbyty.
Cyfaddefodd Kian Bateman, o Gaerau, Caerdydd, i achosi marwolaeth ac anafiadau drwy yrru'n beryglus, ond gwadodd iddo lofruddio Shelley Davies ac ymgais i lofruddio David Bratcher.
Yn dilyn treial yn Llys y Goron Caerdydd, cafwyd Bateman, 19 oed, yn euog o lofruddio ac o achosi niwed corfforol difrifol yn fwriadol.
Dywedodd y Ditectif Brif Arolygydd Matt Powell o Heddlu De Cymru: “Roedd teulu a ffrindiau Shelley Davies yn ei charu'n fawr. Rydym yn parhau i feddwl amdanynt heddiw fel yr ydym wedi gwneud drwy gydol y cyfnod ofnadwy hwn.
“Rydym yn croesawu'r euogfarnau yn y llys heddiw a hoffem ddiolch i'r holl dystion a gynorthwyodd gyda'r ymchwiliad, cymuned Caerau, yn ogystal â'r tîm erlyn.”
Bydd y dedfrydu ar 3 Gorffennaf.