Carcharu dyn gyda gwerth £20,000 o gyffuriau yn ei gartref

Mae dyn wedi cael ei garcharu ar ôl i swyddogion ddarganfod swm o gocên gwerth £20,000 yn ei eiddo yn Nhonypandy

Mae dyn wedi cael ei garcharu ar ôl iddo gael ei ddarganfod gyda thua 180 o becynnau o gocên gwerth £20,000 yn ei gartref.

Cafodd Daryl Bees, 33 oed o Donypandy, ei ddedfrydu i dair blynedd a chwe mis yn y carchar ar ôl iddo gael ei euogfarnu.

Cafodd ei ddedfrydu ddydd Mercher 6 Mai yn Llys y Goron Abertawe lle plediodd Bees yn euog i fod â chocên yn ei feddiant gyda'r bwriad o'i gyflenwi ac ymwneud â chyflenwi cocên.

Mae hyn yn dilyn ymchwiliad ar ôl i swyddogion dderbyn gwybodaeth am ddeliwr cocên posibl oedd yn byw yn Nhonypandy.

Cynhaliodd swyddogion Heddlu De Cymru ymholiadau i arestio Bees gan fynd i’w gyfeiriad yn Nhonypandy, lle daethant o hyd iddo a’i arestio. Wrth chwilio'r eiddo, daeth swyddogion o hyd i tua 180 o becynnau stryd o gocên gwerth rhyw £20,000. Daethpwyd o hyd i gloriannau a ffôn symudol hefyd.

Dywedodd Cwnstabl yr Heddlu Adam Lewis, “Mae delwyr cyffuriau yn ceisio cuddio eu gweithgareddau a byddant bob amser yn ceisio osgoi swyddogion, ond byddwn yn achub ar bob cyfle sydd ar gael i ni i ymchwilio. Mae'r gwaith hwn yn aml yn gofyn am amynedd a dyfalbarhad, ond byddwn yn gwneud popeth sydd ei angen i sicrhau bod y rhai sy'n delio cyffuriau yn cael eu harestio a'u dwyn o flaen eu gwell.”