Carcharu dyn o Ferthyr am droseddau aflonyddu

Mae dyn wedi cael ei garcharu ar ôl iddo anfon negeseuon llais bygythiol a chamdriniol at ei ddioddefwr.

Cafodd Robert Davies, 54 oed o Ferthyr Tudful, ei ddedfrydu i flwyddyn yn y carchar ar ôl cael ei euogfarnu.

Cafodd Davies ei ddedfrydu ddydd Iau 13 Mai yn Llys y Goron Caerdydd lle plediodd yn euog i un cyhuddiad o aflonyddu gan achosi ofn o drais ac un cyhuddiad o achosi difrod troseddol.

Daw hyn ar ôl i’r dioddefwr gysylltu â'r heddlu a dweud ei bod wedi bod yn derbyn galwadau cyson gan rif anhysbys, gan gynnwys 11 o negeseuon llais. Yn rhai o'r negeseuon llais, fe wnaeth Davies fygwth trywanu'r dioddefwr i farwolaeth a dywedodd y byddai angen iddi fod yn rhan o raglen amddiffyn tystion er mwyn iddi ddiogelu ei hun rhagddo.

Dywedodd y dioddefwr ei bod yn gwybod mai Davies oedd yn ei ffonio. Roedd Davies eisoes yn destun amodau mechnïaeth ac nid oedd yn cael cysylltu â'r dioddefwr. Tra oedd Davies yn y ddalfa am y drosedd, achosodd ddifrod i'w gell.

Dywedodd PC Cara Roberts, “Cafodd y dioddefwr ei haflonyddu’n gyson gan Robert Davies ac ni ddylai neb orfod wynebu hyn.

Achosodd y negeseuon llais i’r dioddefwr deimlo’n llawn ofn a gofid, ac ni ddangosodd Davies unrhyw edifeirwch am ei weithredoedd.

“Mae unrhyw fath o aflonyddu yn gwbl annerbyniol a ni chaiff ei oddef gan yr heddlu. Dylai unrhyw un sy'n wynebu'r math hwn o ymddygiad roi gwybod i ni amdano ar unwaith.”