Heddlu De Cymru wedi cael diolch ar ôl dedfrydu troseddwr rhyw â phlant yn yr Alban

Diolchwyd i dimau Heddlu De Cymru am eu hymdrechion ar ôl iddynt helpu i ddwyn dyn a oedd wedi cyflawni nifer o droseddau rhyw yn erbyn plant i gyfrif.

Cafodd Alexander Hamill, 68 oed, ei garcharu am 16 o flynyddoedd heddiw am gyfres o droseddau a gyflawnwyd yn yr Alban ac Abertawe. Roedd yr ymchwiliad wedi cael ei arwain gan Heddlu'r Alban.

Cafodd Hamill ei ddisgrifio fel “rheibiwr didrugaredd” ar ôl iddo gyflawni nifer o droseddau yn erbyn dau fachgen a dwy ferch yn y 1990au.

Gwnaeth Ditectif Brif Arolygydd Heddlu'r Alban, Darren Munogee, dalu teyrnged i ddewrder dioddefwyr Hamill, gan ddweud:

“Rwy'n gobeithio y bydd cael gwybod bod Hamill yn y carchar yn awr yn rhoi rhywfaint o gysur iddyn nhw."

Ychwanegodd y Ditectif Brif Arolygydd:

"Roedd hwn yn ymchwiliad heriol iawn. Hoffwn i ddiolch i'r holl swyddogion oedd yn rhan o’r ymchwiliad, gan gynnwys cydweithwyr yn Heddlu De Cymru."

Darllenwch y stori lawn drwy Heddlu’r Alban yma.

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.