Heddlu yn defnyddio cerbyd nwyddau trwm i atal 63 o yrwyr diofal

Gwnaeth swyddogion plismona'r ffyrdd yn Heddlu De Cymru stopio 63 o gerbydau yr wythnos diwethaf fel rhan o ymgyrch i fynd i'r afael â gyrru'n anghyfreithlon yn Ne Cymru.

Maent wedi ymuno â National Highways a'r Asiantaeth Safonau Gyrwyr a Cherbydau yn yr ymgyrch wythnos o hyd a ddechreuodd ddydd Llun 16 Mawrth, ac a daeth i ben ddydd Iau 19 Mawrth.

Defnyddiodd y swyddogion gerbyd nwyddau trwm (HGV), a ddarparwyd gan National Highways, i gadw llygad ar yrwyr - roedd y seddi uwch mewn caban HGV yn ddelfrydol i'r swyddogion weld y tu mewn i gerbydau a gweld ymddygiad gyrru anniogel.
Cafodd cyfanswm o 63 o gerbydau eu stopio; roedd y rhan fwyaf ohonynt yn ymwneud â gyrwyr yn defnyddio ffôn symudol neu'n peidio â gwisgo gwregys diogelwch, ond canfuwyd amrywiaeth eang o droseddau eraill hefyd, gan gynnwys gyrru heb yswiriant, gyrru heb MOT na threth ffyrdd, ynghyd â diffygion eraill ar gerbydau.
Dywedodd yr Arolygydd Michael Prickett: “Er bod y rhan fwyaf o bobl yn gyrru'n gyfrifol, mae eraill yn parhau i beri risg ddifrifol i'w hunain, i'w teithwyr, ac i ddefnyddwyr eraill y ffyrdd. Mae cerbyd yn arf marwol mewn dwylo anghyfrifol, ac mae unrhyw un nad oes ganddo reolaeth lawn o gerbyd wrth yrru yn peryglu bywydau. Mae llawer gormod o anafiadau difrifol a marwolaethau ar ein ffyrdd, ac mae esgeuluster ar ran gyrrwyr yn ffactor sy'n codi'n llawer rhy aml."
Yn 2025, cafodd dros 150 o bobl eu hanafu'n ddifrifol a bu farw 20 o bobl yn drasig o ganlyniad i wrthdrawiadau traffig ffyrdd ar ffyrdd De Cymru.
Ychwanegodd yr Arolygydd Prickett: “Roedd yr ymgyrch yn targedu'r gyrwyr a'r gweithredwyr hynny sy'n esgeuluso deddfwriaeth diogelwch ar y ffyrdd a safonau amgylcheddol. Mae hyn yn ein galluogi i anfon neges gref ein bod yn chwilio am ymddygiad fel hyn ac na fyddwn yn ei oddef.”
Yr ymgyrch yr wythnos diwethaf oedd ymgyrch gyntaf y flwyddyn. Dyma'r unfed flwyddyn ar ddeg y mae Ymgyrch Tramline wedi bod yn rhedeg mewn lleoedd ar draws y DU.