Cyfle i chi ddweud eich dweud: Mae Heddlu De Cymru’n gofyn am adborth mewn arolwg blynyddol

Mae Heddlu De Cymru wedi lansio eu harolwg blynyddol, gan annog y cyhoedd i fynegi eu barn am blismona yn eu hardal leol.

Mae Heddlu De Cymru wedi ymrwymo i wasanaethu'r cyhoedd; ond mae angen adborth y cyhoedd arnynt er mwyn sicrhau eu bod yn cael pethau’n iawn.

Cafodd yr arolwg byr a syml ei lansio ddydd Mawrth (2 Mehefin) i ddarganfod beth mae pobl De Cymru yn ei feddwl am eu heddlu. Bydd yr arolwg ar agor am chwe wythnos (tan 13 Gorffennaf).

Mae'r arolwg 'Ymddiriedaeth a Hyder' blynyddol wedi cael ei gynhyrchu gan Heddlu De Cymru i gasglu safbwyntiau pobl am eu heddlu lleol, troseddu, diogelwch, ac i helpu i lunio dyfodol plismona yn eu hardal.

Dywedodd y Prif Gwnstabl Cynorthwyol Trudi Meyrick:

“Mae'r arolwg hwn yn wirioneddol bwysig gan ei fod yn rhoi darlun clir a gonest i’r heddlu o'r hyn rydyn ni'n ei wneud yn dda, a'r hyn y mae angen i ni ei newid yn eich barn chi.

“Rydym yn gweithio'n barhaus i fod yn well a gwneud yn well, a bydd eich ymatebion yn ein helpu i wneud hynny. Gweledigaeth Heddlu De Cymru yw bod yn wasanaeth heddlu rhagorol, hygyrch a dibynadwy y mae ein cymunedau’n ymddiried ynddo.

“Felly, cymerwch ran, manteisiwch ar y cyfle hwn i ddweud eich dweud, a rhannwch eich teimladau. Byddwn yn gwrando arnoch, byddwn yn cymryd eich barn o ddifrif, a byddwn yn defnyddio eich adborth i lywio'r hyn a wnawn yn y dyfodol.”  

Mae'r arolwg ar gael yma: https://bit.ly/TC-CYM

Ni fyddwn yn gofyn i chi nodi unrhyw wybodaeth y mae modd eich adnabod ohoni, a bydd pob un o’ch atebion yn gwbl gyfrinachol.