Apêl am dystion a lluniau teledu cylch cyfyng yn dilyn ymosodiad difrifol ym Mharc Lydstep, Gabalfa

Mae Heddlu De Cymru'n ymchwilio i ymosodiad difrifol ym Mharc Lydstep, Gabalfa, Caerdydd, a ddigwyddodd ychydig cyn 7pm neithiwr (dydd Sul 31 Mai).

Cafodd dau fachgen lleol, sy'n 16 a 17 oed, eu cludo i Ysbyty Athrofaol Cymru gydag anafiadau trywanu. Yn ffodus, nid yw eu hanafiadau yn peryglu eu bywydau ac mae un o'r dioddefwyr wedi cael ei ryddhau o'r ysbyty.

Mae ditectifs yn chwilio am ddau unigolyn y maen nhw’n meddwl oedd ar gefn beic Surron ym Mharc Lydstep a Rhodfa Gabalfa adeg yr ymosodiad.

Mae swyddogion wedi dod o hyd i gyllell.

Dywedodd y Ditectif Arolygydd Phil Marchant, o Heddlu De Cymru: “Mae bob amser yn destun pryder mawr pan fydd rhywun yn cael ei drywanu, ond mae oedran y ddau ddioddefwr yn debygol o beri gofid i rieni a phobl ifanc eraill yn yr ardal.

“Rydyn ni'n cynnal ymholiadau helaeth er mwyn dod o hyd i'r bobl sy'n gyfrifol cyn gynted â phosibl, a bydd lluniau teledu cylch cyfyng yn rhan allweddol o'r ymchwiliad.

“Gofynnwn yn daer ar unrhyw dystion neu unrhyw un sydd â lluniau teledu cylch cyfyng i gysylltu â Heddlu De Cymru neu Crimestoppers yn ddienw.

“Rydym yn ymwybodol o bryderon parhaus am y defnydd anghyfreithlon a gwrthgymdeithasol o e-feiciau a beiciau modur yn ardal Gabalfa.

"Mae’n bosibl y gwelwch chi fwy o swyddogion heddlu yn yr ardal, a bydd hynny’n parhau yn ystod y dyddiau nesaf."

Cysylltwch â ni drwy un o'r ffyrdd canlynol, gan grybwyll 2600170643.

💻Cysylltwch â ni ar-lein yn https://bit.ly/SWPProvideInfo

📞Ffoniwch 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.