Carchar i dri dyn o Abertawe am dwyll DVLA

Mae tri dyn o Abertawe wedi cael eu carcharu ar ôl bod yn rhan o gynllun twyll saith ffigwr.

Defnyddiodd Matthew Holloway, 32 oed o Birchgrove – sef un o weithwyr yr Asiantaeth Drwyddedu Gyrwyr a Cherbydau - systemau ei gyflogwr i newid cofnodion a diwygio dogfennau cofrestru cerbydau er mwyn gwerthu cerbydau â hanes ffug ac elwa’n ariannol.

Roedd Holloway yn gweithio ochr yn ochr â dau werthwr ceir – Ashley Harries, 44 oed o Lansamlet, a Joshua Sawyer, 32 oed o Dreforys.

Plediodd y tri dyn yn euog i gynllwynio i gyflawni twyll drwy ymhoniad anwir ar 19 Ionawr.

Mae Matthew Holloway wedi cael ei ddedfrydu i 63 mis yn y carchar. Bydd Joshua Sawyer yn treulio 27 mis yn y carchar, ac mae Ashley Harris wedi cael ei ddedfrydu i 32 mis yn y carchar.

Dywedodd y Rhingyll Emma Adamiec: "Byddai gweithredoedd Matthew Holloway i gael budd ariannol iddo ef a'i gydweithwyr wedi peryglu bywydau pobl eraill.

“Ni fyddai’r bobl a brynodd geir gyda dogfennau ffug wedi gwybod p’un a oedd y cerbydau hyn mewn damwain yn y gorffennol, yn defnyddio platiau wedi’u clonio, neu p’un a gawsant eu dwyn.

“Roedd cyd-ddiffynyddion Holloway yn ei dalu am ei weithredoedd anghyfreithlon.

“Roedd y tri dyn yn ddi-hid ac yn anonest ac mi fyddan nhw’n treulio cyfnod haeddiannol yn y carchar yn awr.”